బైడెన్​ రాకతో ట్రంప్​ 'సోడా బటన్​' మాయం

అగ్రరాజ్య అధ్యక్ష పదవి చేపట్టిన అనంతరం శ్వేతసౌధంతో పాటు ఓవెల్​ ఆఫీస్​లో పలు మార్పులు చేశారు బైడెన్​. ఇందులో భాగంగా ట్రంప్ ఉపయోగించిన సోడా బటన్​ను తీసేసినట్టు తెలుస్తోంది. ఇప్పటివరకు బయటకు వచ్చిన ఫొటోల్లో అది ఎక్కడా కనపడలేదు. డైట్​ కోక్​ కోసం ఆ బటన్​ ఉన్న చెక్క బాక్సును ఉపయోగించేవారు ట్రంప్​. బటన్​ను నొక్కిన వెంటనే శ్వేతసౌధం సిబ్బంది ఆయనకు సోడా ఇచ్చేవారు.​

అమెరికా మాజీ అధ్యక్షుడు డొనాల్డ్​ ట్రంప్​.. తన హయాంలో చేపట్టిన చర్యలను నూతన అధ్యక్షుడు జో బైడెన్​ ఒక్కొక్కటిగా మారుస్తూ వస్తున్నారు. అయితే అధ్యక్ష కార్యాలయం 'ఓవెల్​ ఆఫీస్​'లోనూ పలు మార్పులు తీసుకొచ్చారు బైడెన్​. మార్పులు జరిగిన తర్వాత ట్రంప్​ 'సోడా బటన్​' మాయం అయిపోయింది. ఈ వ్యవహారంపై సామాజిక మాధ్యమాల్లో విపరీతంగా చర్చ నడుస్తోంది. అసలు ఏంటి ఈ 'సోడా బటన్​?'

డైట్​ కోక్​ కోసం..

ఓవెల్​ ఆఫీస్​లో ట్రంప్​ టేబుల్​ మీద ఫోన్​, పుస్తకాలు, దస్త్రాలు ఉండేవి. వాటితో పాటు ఓ చెక్క బాక్సు కూడా ఉండేది. దాని మీద ఎర్రటి రంగులో ఓ బటన్​ ఉండేది. ఎప్పుడైనా డైట్​ కోక్​ కావాలనుకుంటే ఆ బటన్​ను నొక్కేవారు ట్రంప్​. శ్వేతసౌధానికి చెందిన సిబ్బంది వెంటనే ఆయనకు సోడా తీసుకొచ్చి ఇచ్చేవారు.

ట్రంప్​ 'సోడా బటన్​'

ఈ విషయాన్ని 2017లో ట్రంప్​.. స్వయంగా పలు వార్తా సంస్థలకు వెల్లడించారు. అప్పటి నుంచి అనేక మార్లు ట్రంప్​ ఫొటోల్లో ఆ సోడా బటన్​ దర్శనమిచ్చింది.

తాజాగా ఈ బటన్​ను బైడెన్​ తొలిగించినట్టు తెలుస్తోంది. ఓవల్​ ఆఫీస్​లో అధ్యక్షుడికి సంబంధించి ఇప్పటివరకు బయటకు వచ్చిన ఫొటోల్లో ఆ బటన్​, చెక్క బాక్సు కనపడలేదు. ఆయన టేబుల్​ మీద రెండు ఫోన్లు, కాఫీ కప్పు, పెన్నులు దర్శనమిచ్చాయి.

బైడెన్​ టేబుల్​

ఒబామా కూడా..

అయితే ఈ సోడా బటన్​ను ట్రంప్​ ఒక్కరే ఉపయోగించలేదు. గతంలో ఒబామా కూడా ఆ బాక్సుతో కనపడ్డారు.

ఇదీ చూడండి:- ట్రంప్​ 'గోడ' నిర్మాణానికి బైడెన్​ బ్రేకులు