అనార్మ్డ్ ప్రొటోటైప్ హైపర్సోనిక్ క్షిపణిని విజయవంతంగా పరీక్షించినట్లు అమెరికా రక్షణ శాఖ పెంటగాన్ తెలిపింది. ధ్వని కన్నా 5 రెట్ల వేగంతో దూసుకెళ్లే ఈ క్షిపణి.. దుర్భేద్యమైన రక్షణ వ్యవస్థలను కూడా ఛేదిస్తుందని పెంటగాన్ ప్రకటించింది.
2017 అక్టోబర్లో అమెరికా సైనిక విభాగం, నౌకా విభాగం ఉమ్మడిగా చేసిన ప్రయోగాంలో కొన్ని సమస్యలు తలెత్తాయని.. తాజా పరీక్షల్లో హైపర్సోనిక్ వేగంతో లక్ష్యం దిశగా పయనించిందని పెంటగాన్ తెలిపింది.
బాలిస్టిక్, క్రూయిజ్ల కంటే..
అణు బాంబులను కూడా మోసుకెళ్లే సామర్థ్యం ఈ హైపర్సోనిక్ క్షిపణులకు ఉంటుంది. ప్రస్తుతం అణుబాంబులను మోసుకెళ్లేందుకు ఉపయోగిస్తున్న బాలిస్టిక్, క్రూయిజ్ క్షిపణుల కన్నా ఎక్కువ ఎత్తులో, వేగంగా ఈ హైపర్సోనిక్ మిస్సైళ్లు ప్రయాణిస్తాయి. ఫలితంగా శత్రు రక్షణ వ్యవస్థలను ఈ క్షిపణి సులభంగా ఓడిస్తుంది.
రష్యా తొలిసారి..
హైపర్సోనిక్ వేగంతో ప్రయాణించే 'అవన్గార్డ్' క్షిపణులను తయారు చేసినట్లు గత డిసెంబర్లో రష్యా ప్రకటించింది. ఇలాంటి క్షిపణులను రూపొందించిన తొలి దేశంగా రష్యా నిలిచింది. ఇవి గంటకు సుమారు 33వేల కిలోమీటర్లు లేదా మాక్-27 వరకు ఉంటుందని రష్యన్ అధికారులు చెప్పారు.
చైనా కూడా హైపర్సోనిక్ క్షిపణుల అభివృద్ధికి గణనీయమైన పెట్టుబడులు పెడుతోంది. గతేడాది అక్టోబర్లో సైనిక కవాతులో భాగంగా.. డీఎఫ్-17 హైపర్సోనిక్ గ్లయిడ్ వాహనాన్ని ప్రదర్శించింది.
ఇదీ చదవండి: విదేశీయుల వీసాల గడువును పొడిగించిన కేంద్రం
