పాకిస్థాన్తో 1971లో జరిగిన యుద్ధంలో అమెరికా వైఖరి భారత్కు అనుకూలంగా లేదు. పాక్కే మద్దతు ఇచ్చింది. ఇందుకు అమెరికా స్వప్రయోజనాల కన్నా అప్పటి అధ్యక్షుడి జాతి వివక్షే కారణం. 1969 నుంచి 1974 వరకు అమెరికా 37వ అధ్యక్షుడిగా పనిచేసిన రిచర్డ్ నిక్సన్(రిపబ్లికన్ పార్టీ), ఆయన జాతీయ భద్రతా సలహాదారు హెన్రీ కిసింజర్లకు భారతీయులంటే చాలా చులకన భావం ఉండేది. ఇదే వారి విధానాల్లోనూ ప్రతిఫలించింది. ఇందుకు సంబంధించి టేపుల రూపంలోని ఆధారాలు తాజాగా వెల్లడయ్యాయి.
1971 జూన్లో శ్వేత సౌధంలోని ఓవల్ ఆఫీసులో నిక్సన్తో పాటు, అప్పటి చీఫ్ ఆఫ్ స్టాఫ్ హెచ్.ఆర్.హాల్డ్మన్లతో జరిగిన సమావేశంలో నిక్సన్ భారతీయ మహిళలపై నోరు పారేసుకున్నారు. ''వారు ప్రపంచంలోనే అత్యంత అనాకర్షణీయమైనవారు. సందేహం లేదు. శృంగారమంటే తెలియదు. దరిద్రంగా ఉంటారు.'' అని అన్నారు.
అసలు వారెవరికైనా నచ్చుతారా?
1971 నవంబరు నాలుగో తేదీన అప్పటి ప్రధాని ఇందిరాగాంధీ శ్వేత సౌధంలో నిక్సన్తో భేటీ అయ్యారు. విరామం సందర్భంగా నిక్సన్.. కిసింజర్తో మాట్లాడుతూ మళ్లీ భారతీయ మహిళలపై వ్యాఖ్యలు చేశారు. ''వారు నాకు నచ్చరు. అసలు వారెవరికైనా నచ్చుతారా? చెప్పు హెన్రీ'' అని అన్నారు. భారతీయ మహిళలతో శృంగారమంటే ఇష్టపడనంటూ ఉపన్యాసమే ఇచ్చారు. దీనికి కిసింజర్ ఇచ్చిన సమాధానం స్పష్టంగా వినిపించలేదు. అయితే అది అధ్యక్షుని వ్యాఖ్యలను ఖండించేదిగా మాత్రం లేదు.
అదే నెలలో భారత్-పాక్ ఘర్షణలపై కిసింజర్, అప్పటి విదేశాంగ మంత్రి రోగెర్స్లతో చర్చిస్తున్నప్పుడు కూడా భారత మహిళలపై నోరు పారేసుకున్నారు. ''వారు ఎలా పిల్లల్ని కంటారో'' అని వ్యాఖ్యానించారు.
బంగ్లా శరణార్థులకు ఆశ్రయం ఇవ్వడంపై కిసింజర్ మండిపడ్డారు. భారతీయులను పాకీపనివారని తిట్టి పోశారు. బంగ్లాదేశీయులను వధిస్తున్న పాక్ వైఖరిని తప్పుపట్టి అది జాతి నిర్మూలన చర్యలా ఉందని విమర్శించిన భారత్లో అమెరికా రాయబారి కెన్నెత్ కీటింగ్పైనా కిసింజర్ మండిపడ్డారు. అలా అంటావా అని నిలదీశారు. ఇది కూడా నిక్సన్ సమక్షంలో శ్వేత సౌధంలోనే జరిగింది.
భారతీయులు పొగడ్తలతో పడేస్తారని మరోసందర్భంలో కిసింజర్ వ్యాఖ్యానించారు. ''పొగడడంలో వారికి మించినవారు లేరు. ఈ పొగడ్తలతోనే వారు గత 600 ఏళ్లుగా కాలం గడుపుతున్నారు. కీలక పదవుల్లో ఉన్నవారిని పట్టుకోవడంలో వారికి నైపుణ్యం ఉంది. '' అని అక్కసు బయటపెట్టుకున్నారు.
పాక్పై అభిమానం..
పాకిస్థానీయులను పొగడడంలోనూ కిసింజర్ తన అభిమానాన్ని దాచుకోలేదు. ''వారు చాలా మంచివారు. అయితే ఆలోచనల్లో మొరటు''అని అన్నారు.
పాకిస్థాన్కు మద్దతు ఇవ్వడానికి కారణాలు కూడా లేకపోలేదు. అప్పటివరకు చైనా-అమెరికాల మధ్య సంబంధాలు లేవు. చైనాతో సంబంధాలు పెంచుకోవడానికి పాక్ సాయం తీసుకోవడంతోనే ఆ దేశానికి మద్దతు తెలిపారు. పాక్లో సైనిక పాలనకు వంతపాడారు. ఇంతవరకు రహస్య పత్రాలుగా ఉన్న ఈ టేపులను ప్రిన్స్టన్ విశ్వవిద్యాలయానికి చెందిన ప్రొఫెసర్ గ్యారీ బాస్ సేకరించారు. వీటిని క్రోడీకరించి న్యూయార్క్ టైమ్స్లో వ్యాసం రాశారు. ఇవన్నీ దిగ్భ్రాంతికర సంభాషణలన్నారు. అమెరికా అధ్యక్షులు అనుసరించిన జాతివ్యతిరేక విధానాలే విదేశీ వ్యవహారాలపై ప్రభావం చూపాయని పేర్కొన్నారు.
ఇలాంటి మాటలకే పదవి ఊడింది..
నిక్సన్ వ్యాఖ్యలు అనాగరికం, అహంకారపూరితమని నాటి తరం దౌత్యవేత్తలు అభిప్రాయపడ్డారు. ఇలాంటి వైఖరివల్లనే ఆయన పదవిని పోగొట్టుకున్నారని గుర్తు చేశారు. విదేశీ వ్యవహారాల శాఖ మాజీ మంత్రి నట్వర్ సింగ్ మాట్లాడుతూ ''నిక్సన్ తక్కువస్థాయి వ్యక్తి. ఇలాంటి ప్రవర్తన కారణంగానే వాటర్ గేట్ కుంభకోణంలో అభిశంసనకు గురయి పదవి కోల్పోయారు. బంగ్లాదేశీయులను ఊచకోత కోసిన పాక్కు మద్దతు ఇచ్చినందుకు 20 ఏళ్ల తరువాత కిసింజర్ క్షమాపణలు కోరారు. నిక్సన్ అది కూడా చేయలేదు. అమెరికా చర్యలను ఇందిరాగాంధీ సమర్థంగా తిప్పికొట్టారు.'' అని తెలిపారు.
ఆ సమయంలో యువ ఐఎఫ్ఎస్ అధికారిగా పనిచేసిన కేంద్ర మాజీ మంత్రి మణిశంకర్ అయ్యర్ తన అభిప్రాయం చెబుతూ ' నిక్సన్ మాటలు అసభ్యకరం. అప్పట్లో అమెరికా యువకుల వ్యవహార శైలి కూడా ఇలాగే ఉండేది. ఇతర నాయకుల మాదిరిగా ఇందిరాగాంధీ తనకు భయపడడం లేదన్న భావన నిక్సన్లో ఉండేది. పరిస్థితిని గమనించిన ఇందిర బంగ్లాదేశ్ యుద్ధం సమయంలో తన సొంత పద్ధతిలో వెళ్లి విజయం సాధించారు. అందుకే ఆమె అంటే ఆయనకు కోపం.'' అని అన్నారు.
నిక్సన్ వ్యక్తిత్వం అసలు బాగోదు
అమెరికాలో రాయబారిగా పనిచేసిన మీరాశంకర్ మాట్లాడుతూ '' ఇందిరాగాంధీ అంటే నిక్సన్కు పడేది కాదు. దాంతోపాటు పాక్ సాయంతో చైనాతో సంబంధాలు పెట్టుకోవాలని ప్రయత్నాలు చేశారు. '' అని తెలిపారు.
వివిధ దేశాల్లో రాయబారిగా పనిచేసిన ప్రముఖ దౌత్యవేత్త జి.పార్థసారధి తన అభిప్రాయం చెబుతూ ''నిక్సన్ వ్యక్తిత్వం, మాట తీరు అసలు బాగోదు. పాక్-చైనా-అమెరికా సంబంధాలు బలపడడానికి ఆయన ప్రయత్నించారు. అయితే అంతర్జాతీయ వేదికలపై ఆయనను ఇందిరాగాంధీ సమర్థంగానే అదుపుచేశారు.'' అని నాటి సంఘటనను గుర్తుచేసుకున్నారు. భారత్-అమెరికా సంబంధాలు సంతృప్తికర స్థాయిలో ఉన్న ప్రస్తుత తరుణంలో ఈ వివరాలు వెల్లడికావడం దురదృష్టకరమని విదేశీ వ్యవహారాల శాఖ మాజీ కార్యదర్శి సల్మాన్ హైదర్ వ్యాఖ్యానించారు.
ఇదీ చూడండి:మంచులో రెండున్నర గంటలు ఉండి రికార్డు!
