అమెరికా ఉపాధ్యక్షురాలిగా కమలా హారిస్ బాధ్యతలు చేపట్టిన తరుణంలో శ్వేతసౌధం కీలక ప్రకటన చేసింది. కమలా హారిస్ ద్వారా భారత్, అమెరికా మధ్య సంబంధాలు మరింత బలపడతాయని పేర్కొంది. ఈ మేరకు శ్వేతసౌధ పత్రికా వ్యవహారాల కార్యదర్శి జెన్ సాకి తెలిపారు. అమెరికా 46వ అధ్యక్షుడిగా జో బైడెన్ ప్రమాణ స్వీకారం చేసిన మరుసటిరోజున విలేకరులతో ఆమె మాట్లాడారు.
"అధ్యక్షుడు జో బైడెన్.. భారత్లో అనేక సార్లు పర్యటించారు. భారత్, అమెరికా మధ్య ఉన్న ద్వైపాక్షిక సంబంధాలను ఆయన గౌరవిస్తారు. ఇక ముందు కూడా దానిని ఆయన కొనసాగిస్తారు. ఉపాధ్యక్షురాలు కమలా హారిస్ ద్వారా ఇరు దేశాల మధ్య బంధం మరింత బలోపేతమవుతుంది."
-- జెన్ సాకి, శ్వేతసౌధ పత్రికా వ్యవహారాల కార్యదర్శి
అమెరికా ఉపాధ్యక్షురాలిగా భారతీయ అమెరికన్ కమలా హారిస్.. ప్రమాణ స్వీకారం చేయడం.. చరిత్రాత్మక సందర్భం అని సాకి పేర్కొన్నారు.
ఇదీ చూడండి:'అమ్మ నమ్మకమే నన్ను ఈ స్థాయికి చేర్చింది'
