రోగులకు హైడ్రాక్సీ క్లోరోక్విన్ మాత్రలను ఇవ్వడం ద్వారా కరోనాను దూరం చేయవచ్చని కొందరు భావిస్తున్నారు. ఇప్పటికే కొన్నిచోట్ల వైద్యులు దీనిని సిఫారసు చేస్తున్నారు. ఈ ఔషధం సామర్థ్యంపై ప్రపంచవ్యాప్తంగా పరిశీలనలు సాగుతూనే ఉన్నాయి. తమకు హైడ్రాక్సీ క్లోరోక్విన్ మాత్రలను పంపాలని సాక్షాత్తూ అమెరికా అధ్యక్షుడు ట్రంప్‌... మన ప్రధాని నరేంద్రమోదీకి ఫోన్‌ చేసి అడిగారు. ఈ నేపథ్యంలో ఈ ఔషధం వాడకం, దాని సామర్థ్యంపై సర్వత్రా చర్చ సాగుతోంది.
మోతాదుకు మించివాడితే అంతే..
దీర్ఘకాలిక వ్యాధులు, వ్యాధి నిరోధక సమస్యలతో ఇబ్బందిపడే రోగులకు ఇచ్చేందుకు హైడ్రాక్సీ క్లోరోక్విన్ మాత్రలు సురక్షితమే అయినప్పటికీ... ఈ ఔషధాన్ని మోతాదుకు మించి వాడితే నేత్ర సంబంధిత ఇబ్బందులు వచ్చే ప్రమాదం లేకపోలేదని నిపుణులు హెచ్చరిస్తున్నారు. ఇప్పటికే హెచ్చు మోతాదులో సుదీర్ఘకాలం ఈ మందులను వాడటం వల్ల కొందరు రోగుల కళ్లలో రెటీనా చుట్టూ విషపూరిత పొర ఏర్పడినట్లు, చూపు తగ్గిపోయినట్లు పేర్కొన్నారు. మరికొందరిలో వికారం, వాంతులు, తిమ్మిర్లు, విరేచనాలు తదితర సమస్యలు తలెత్తినట్లు చెప్పారు. కరోనా రోగులు ఈ మాత్రలను విచ్చలవిడిగా కాకుండా వైద్యుల పర్యవేక్షణలో వాడుతూ మోతాదుకు సంబంధించి జాగ్రత్తగా వ్యవహరించాలని సూచించారు.
ఇదీ చదవండి: కరోనా కాలాన పరీక్షా సమయమిది!
