అమెరికాలో మరోసారి కాల్పులు కలకలం సృష్టించాయి. మిస్సోరీలోని ఓ గ్యాస్ స్టేషన్లో చొరబడిన సాయుధుడు భీకర కాల్పులకు తెగబడ్డాడు. ఈ ఘటనలో దుండగుడితో పాటు ఓ పోలీసు అధికారి, మరో ముగ్గురు ప్రాణాలు కోల్పోయారు.
అలాగే ఒక పోలీసు అధికారితో పాటు మరో వ్యక్తి ఈ దాడిలో గాయపడినట్లు స్ప్రింగ్ ఫీల్డ్ పోలీస్ అధికారి పాల్ విలియమ్స్ పేర్కొన్నారు. కాల్పులపై సమాచారం అందుకొని ఘటనాస్థలికి చేరుకున్నట్లు తెలిపారు.
కాల్పుల ప్రాంతానికి ముందుగా చేరుకున్న ఇద్దరు పోలీసులపైనా దుండగుడు కాల్పులు జరిపినట్లు విలియమ్స్ వెల్లడించారు. అనంతరం స్టోర్ లోపలికి వెళ్లిన పోలీసులు.. దుండగుడితో పాటు మిగతా మృతదేహాలను గుర్తించినట్లు చెప్పారు.
అయితే తనను తాను కాల్చుకోవడం వల్లే సాయుధుడు మరణించి ఉండొచ్చని పోలీసులు అనుమానిస్తున్నారు. గాయపడ్డ పోలీసుల పరిస్థితి క్షేమంగానే ఉన్నట్లు అధికారులు స్పష్టం చేశారు.
