కరోనా మహమ్మారి ధాటికి ప్రపంచవ్యాప్తంగా వేల సంఖ్యలో ప్రజలు ప్రాణాలు కోల్పోతున్నారు. లక్షల మంది ఈ వైరస్ బారిన పడుతున్నారు. వైరస్ సోకిన వారిపై మలేరియా మందు హైడ్రాక్సీక్లోరోక్విన్ మంచి ప్రభావం చూపుతోందని కొందరు వైద్యులు విశ్వసిస్తున్నారు. అయితే.. హైడ్రాక్సీక్లోరోక్విన్తో పాటు యాంటిబయోటిక్ అజిత్రోమైసిన్ను వినియోగిస్తే గుండెకు ముప్పు పెరుగుతుందని ఓ నివేదిక హెచ్చరిస్తోంది. ఈ ఔషధాలను వినియోగించే క్రమంలో జాగ్రత్తలు వహించాలని.. లేదంటే హృదయ స్పందనల్లో ఇబ్బందులు తలెత్తుతాయని వెల్లడించింది.
అమెరికా న్యూయార్క్లోని కార్డియాలజీ కళాశాలకు చెందిన మాగజైన్లో ఈ పరిశోధన ప్రచురితమైంది. ఒరెగావ్ హెల్త్ అండ్ సైన్స్ విశ్వవిద్యాలయం(ఓహెచ్ఎస్యూ), ఇండియానా విశ్వవిద్యాలయానికి చెందిన కార్డియాలజిస్టులు.. హైడ్రాక్సీక్లోరోక్విన్, అజిత్రోమైసిన్ వాడకాలపై పరిశోధన చేశారు. కొవిడ్-19 రోగులకు మలేరియా-యాంటిబయోటిక్ మందుల కలయికతో చికిత్స అందిస్తున్న వైద్యులకు పలు సూచనలు చేశారు. ఈ 2 మందుల్ని కలిపి ఉపయోగిస్తే గుండె గదులు మూసుకుపోవటం, సక్రమంగా కొట్టుకోకపోవటం లేదా కొన్ని సందర్భాల్లో ఆగిపోయే ప్రమాదం ఉందని హెచ్చరించారు.
" కొవిడ్-19 చికిత్సకు హైడ్రాక్సీక్లోరోక్విన్, అజిత్రోమైసిన్ ప్రభావం చూపుతున్నాయనే దానిపై ప్రస్తుతానికి చాలా తక్కువ సమాచారం ఉంది. అయినప్పటికీ.. కొంతమంది వైద్యులు కరోనా చికిత్సకు వీటిని ఉపయోగించేందుకు మొగ్గు చూపుతున్నారు. కరోనా రోగులకు ఈ ఔషధాలను వినియోగించాలనుకునే వైద్యులు వాటి దుష్ప్రభావాలను తెలుసుకోవాలని కోరుతున్నాం. "
- ఎరిక్ స్టెక్కెర్, ఓహెచ్ఎస్యూ అసోసియేట్ ప్రొఫెసర్
ఈ ఔషధాలను వినియోగించే క్రమంలో రోగుల గుండె స్పందనల్లో మార్పులను గమనిస్తూ ఉండాలని సూచించారు నిపుణులు.
హైడ్రాక్సీక్లోరోక్విన్తో మంచి ఫలితాలు: ట్రంప్
కరోనా సోకిన రోగులపై దశాబ్దాల కాలం నాటి మలేరియా మందు హైడ్రాక్సీక్లోరోక్విన్ మంచి ఫలితాలను ఇస్తోందన్నారు అమెరికా అధ్యక్షుడు డొనాల్డ్ ట్రంప్. దీన్ని ఒక అసాధారణ విషయంగా పేర్కొన్నారు. హైడ్రాక్సీక్లోరోక్విన్ ఔషధాల కొరత లేదని తెలిపారు. కరోనా వైరస్ నిరోధానికి, చికిత్సకు సంబంధించి హైడ్రాక్సీక్లోరోక్విన్ ప్రభావం, ఇతర థెరపీలపై పరిశోధన చేస్తున్నామని.. దీనిపై అమెరికా ప్రజలకు ఎప్పటికప్పుడు సమాచారం అందిస్తామన్నారు ట్రంప్.
ఇదీ చూడండి: కరోనాపై యాంటీ మలేరియా డ్రగ్ మెరుగ్గా పనిచేయదట!
