అమెరికా అధ్యక్ష ఎన్నికల్లో ఏ దేశం జోక్యం చేసుకున్నా.. తాను గెలిచాక తగిన మూల్యం చెల్లించక తప్పదని హెచ్చరించారు డెమొక్రటిక్ పార్టీ అభ్యర్థి జో బైడెన్. ట్రంప్- బైడెన్ మధ్య నాస్విల్లేలోని బెల్మాంట్ విశ్వవిద్యాలయంలో జరిగిన చివరి సంవాదంలో అమెరికా ఎన్నికల్లో విదేశీ జోక్యాన్ని ఎలా అడ్డుకుంటారని అనుసంధానకర్త వేసిన ప్రశ్నకు బదులుగా బైడెన్ ఈ వ్యాఖ్యలు చేశారు.
" అమెరికా సార్వభౌమత్వం విషయంలో వారు జోక్యం చేసుకుంటున్నారు." అని రష్యా, ఇరాన్, చైనాను ఉద్దేశించి అన్నారు బైడెన్. ఎన్నికల్లో మితిమీరిన జోక్యం చేసుకోవడానికి ఇరాన్ ప్రయత్నిస్తుందని ఆరోపించారు. ట్రంప్ కూడా ఈ విషయం తనకు తెలుసు అని ధ్రువీకరించినట్లు బైడెన్ పేర్కొన్నారు.
ఇదీ చూడండి: అమెరికా ఓటర్లకు ఇరాన్ 'ఈమెయిల్' బెదిరింపులు!
రష్యా హ్యాకర్ల దాడి..
అమెరికాలోని స్థానిక ప్రభుత్వాల నెట్వర్క్లపై రష్యా హ్యాకర్లు దాడి చేసినట్లు అమెరికా నిఘా వర్గాలు తెలిపాయి. రెండు సర్వర్ల నుంచి డేటాను సైతం అపహరించినట్లు అధికారులు వివరించారు. ఎన్నికలకు ఇంకా రెండు వారాలు మాత్రమే మిగిలి ఉన్న నేపథ్యంలో ఇలా జరగడం ఓటింగ్, ఫలితాలపై ప్రభావితం చూపే అవకాశం ఉందని అనుమానిస్తున్నారు. ఈ నేపథ్యంలోనే బైడెన్ పైవ్యాఖ్యలు చేశారు.
