2015 అణు ఒప్పందంపై తిరిగి చర్చలు జరపాలంటే తమపై ఉన్న ఆంక్షలను తొలగించాలన్న ఇరాన్ డిమాండ్ను అమెరికా అధ్యక్షుడు జో బైడెన్ కొట్టిపారేశారు. ఇరాన్పై ఉన్న ఆంక్షలను తొలగించబోమని స్పష్టం చేశారు. అణు ఒప్పందంలో భాగంగా యురేనియం నిల్వలను ఇరాన్ తగ్గిస్తేనే.. ఆ దేశంపై ఉన్న ఆంక్షలను ఎత్తివేస్తామని తేల్చిచెప్పారు. ఈ విషయాన్ని అగ్రరాజ్యంలోని ఓ ప్రముఖ వార్తా సంస్థ వెల్లడించింది.
'అణు ఒప్పందంలో చర్చల్లో భాగంగా.. ఇరాన్ను తిరిగి తెరపైకి తీసుకొచ్చేందుకు.. ఆ దేశంపై ఉన్న ఆంక్షలను తొలగిస్తారా?' అన్న ప్రశ్నకు బైడెన్.. 'లేదు' అని జవాబుచెప్పినట్టు వార్తా సంస్థ పేర్కొంది.
'మీరే తగ్గాలి...'
ఇదే విషయంపై ఇరాన్ సుప్రీం నేత అయతొల్లా అలీ ఖమేనీ ఆదివారం స్పందించారు. చర్చలు జరపాలంటే ఇరాన్పై ఉన్న ఆంక్షలను అమెరికా తొలగించాల్సిందేనని పునరుద్ఘాటించారు.
"జేసీపీఓఏ(జాయింట్ కామ్ప్రహెన్సివ్ ప్లాన్ ఆఫ్ యాక్షన్)లోకి ఇరాన్ తిరిగి చేరాలంటే.. దేశంపై ఉన్న ఆంక్షలను అమెరికా తొలగించాల్సిందే. అది జరిగిన వెంటనే జేసీపీఓఏకు కట్టుబడి ఉంటాం."
--- అయతొల్లా ఖమేనీ, ఇరాన్ సుప్రీం నేత.
ఇదీ చూడండి:- అమెరికా జైలులో ఖైదీల విధ్వంస కాండ
