Fourth City Development In Hyderabad : తెలంగాణ ప్రభుత్వం ప్రతిష్ఠాత్మకంగా నిర్మించతలపెట్టిన నాలుగో నగరం పరిధి మరింత పెరగనుంది. ఇబ్రహీంపట్నం, కందుకూరు, మహేశ్వరం, కడ్తాల్, అమన్‌గల్ మండలాల్లోని 45 గ్రామాలను దాని పరిధిలో చేర్చాలని ఉన్నతాధికారులు నిర్ణయించారు. ఆ మండలాలను ఫ్యూచర్‌సిటీలో విలీనం చేయాలా? యధాతథంగా పురపాలక, మండలాల పరిధుల్లోనే కొనసాగించాలా? అనే అంశాలకు సంబంధించి రెవెన్యూ అధికారులు వివరాలు సేకరించారు. ఇప్పటికే కందుకూరు మండలం పరిధిలోని 18 గ్రామాలు నాలుగో నగరంలో ఉన్నాయి. మరో 27 గ్రామాలనూ కలపాలని అధికారులు ప్రతిపాదనలను పంపారు.
మౌలిక వసతులపై దృష్టి : నాలుగో నగరం పరిధి తొలుత 14 వేల ఎకరాలే ఉండగా అధికారులు 1.50 లక్షల ఎకరాలకు ప్రతిపాదించారు. శంషాబాద్, పెద్దఅంబర్‌పేట్, ఇబ్రహీంపట్నంకు వేగంగా వెళ్లేలా రహదారులను నిర్మించనున్నారు. కొంగరకలాన్‌ నుంచి ఆకుతోటపల్లి వరకూ 4 వేల కోట్ల రూపాయలతో 44 కిలోమీటర్ల గ్రీన్ఫీల్డ్ రహదారిని ప్రతిపాదించారు. వీటికి అనుసంధానంగా పరిశ్రమలు, ఇతర సంస్థలకు రహదారుల సౌకర్యం కల్పించనున్నారు.
విలీనమైతే ఇబ్బందా? కాదా? : నాలుగో నగరం విస్తరణలో భాగంగా 45 గ్రామాలను కలిపి జీహెచ్‌ఎంసీ(గ్రేటర్ హైదరాబాద్ మున్సిపల్ కార్పొరేషన్) తరహాలో ఒక కార్పొరేషన్‌ను ఏర్పాటు చేయాలని అధికారులు భావించారు. అప్పుడు గ్రామీణులకు ఇబ్బందులెదురవుతాయని స్థానిక అధికారులు వివరించారు. ఆయా గ్రామాల్లో ఏడాది పొడవునా పంటలనేవి పండవు. కందుకూరు మండలంలోని 18 గ్రామాల్లో అందరూ రైతులు, కూలీలే. వీరందరికీ ఉపాధిహామీ పథకం డబ్బులందుతున్నాయి. ఒకవేళ కార్పొరేషన్‌లో విలీనమైతే ఉపాధి హామీ పథకానికి వారు అనర్హులవుతారు. దీంతో ఏం చేయాలా అనే విషయంపై అధికారులు ఆలోచిస్తున్నారు.
