అమెరికాలో విదేశీ నిపుణులు పనిచేసేందుకు వీలు కల్పించే హెచ్-1బీ వీసాలపై గత అధ్యక్షుడు డొనాల్డ్ ట్రంప్ విధించిన నిషేధం ముగిసింది. ట్రంప్ అమల్లోకి తెచ్చిన నిషేధాజ్ఞల్ని మరింతకాలం కొనసాగించరాదని ప్రస్తుత అధ్యక్షుడు జో బైడెన్ నిర్ణయించగా... వేలాది మంది భారతీయ ఐటీ నిపుణులకు లబ్ధి చేకూరనుంది.
దేశవ్యాప్త లాక్డౌన్, కరోనా సంక్షోభం నేపథ్యంలో.. అమెరికన్లకు నష్టం జరుగుతుందని.. హెచ్-1బీ విసాలతో పాటు ఇతర తాత్కాలిక, నాన్ ఇమ్మిగ్రెంట్ వీసాలపై గతేడాది జూన్లో నిషేధం విధించారు అప్పటి అధ్యక్షుడు ట్రంప్. ఈ ఉత్తర్వులను.. తొలుత 2020 డిసెంబర్ 31వరకు, ఆ తర్వాత 2021 మార్చి 31 వరకు పొడిగించారు. కరోనా మహమ్మారి అగ్రరాజ్య ప్రజలపై తీవ్ర ప్రభావం చూపుతుందని.. పొడిగింపు అవసరమని నాడు ట్రంప్ ప్రభుత్వం పేర్కొంది. అయితే.. బైడెన్ సర్కార్ తాజాగా వీటి పొడిగింపుపై ఎలాంటి ప్రకటనా చేయకపోవడం వల్ల.. ఆ గడువు ముగిసిపోయంది.
ట్రంప్ ఇమ్మిగ్రేషన్ విధానాలు కఠినమైనవిగా భావించిన బైడెన్.. హెచ్-1బీ వీసాలపై నిషేధం ఎత్తివేస్తామని ఇదివరకే హామీ ఇచ్చారు.
ఇదీ చదవండి: హెచ్1బీ వీసాదారులకు మరింత ఊరట!
ఏంటీ హెచ్-1బీ వీసా?
'హెచ్-1బీ' అనేది వలసేతర వీసా. నిపుణులైన విదేశీయులను ఉద్యోగాల్లో నియమించుకునేందుకు ఈ వీసా విధానం అమెరికా కంపెనీలకు వీలు కల్పిస్తుంది. దాని ద్వారా భారత్‌, చైనా తదితర దేశాల నుంచి ఏటా వేల సంఖ్యలో ఐటీ నిపుణులు అగ్రరాజ్యానికి వెళ్లగలుగుతున్నారు. ట్రంప్ ప్రకటన గడువు ముగియడం వల్ల.. అమెరికన్ దౌత్య విభాగం ఇకపై హెచ్-1బీ వీసాలు జారీ చేస్తాయి. ఫలితంగా.. యూఎస్ కంపెనీలు ప్రతిభావంతులైన సాంకేతిక నిపుణుల్ని దేశంలోకి ఆహ్వానిస్తాయి.
ఇదీ చదవండి: 'మార్స్ మిషన్' సమాచారాన్ని ఇస్రోతో పంచుకున్న నాసా
