అమెరికా 46 వ అధ్యక్షుడిగా జోబైడెన్ మరి కొన్ని గంటల్లో ప్రమాణ స్వీకారం చేయనున్నారు. ఆ వెంటనే సామాజిక మాధ్యమం ట్విట్టర్లోని అగ్రరాజ్య పాలకవర్గానికి చెందిన పోటస్ సంబంధిత ఖాతాలను డొనాల్డ్ ట్రంప్ నుంచి జో బైడెన్కు బదిలీ కానున్నాయి. అయితే.. ఆ ఖాతాలకు ఉన్న లక్షలాది ఫాలోవర్లు(అనుచరులు) మాత్రం ఈసారి యథాతథంగా కొత్త పాలకవర్గాన్ని అనుసరించలేరు. ఎందుకంటే ట్విట్టర్ ఈసారి కొత్త నియమాలు తీసుకువచ్చింది.
అప్పుడు అలా.. ఇప్పుడు ఇలా
- @POTUS, @whitehouse, @FLOTUS ఖాతాలకు ఈసారి ఫాలోవర్ల కొరత సమస్య ఎదురవనుంది.
- POTUS అంటే.. అమెరికా అధ్యక్షుడికి సంక్షిప్త రూపం. FLOTUS అంటే అమెరికా తొలిమహిళ అని అర్థం.
- ట్విట్టర్లోని ఈ ఖాతాలన్నీ ఏ ఒక్క వ్యక్తికీ శాశ్వతంగా ఉండవు. ప్రభుత్వం మారినప్పుడల్లా ఈ ఖాతాలూ మారుతూ ఉంటాయి.
- గతంలో అధ్యక్షుడిగా ఒబామా పదవీ కాలం ముగిసినప్పుడు ఆయన @POTUS ఖాతాకు ఉన్న ఫాలోవర్లు ఉన్నది ఉన్నట్లుగా ట్రంప్కు వచ్చి చేరారు. అయితే.. ఇప్పుడు మాత్రం ఆ అవకాశం లేదని తెలుస్తోంది.
నోటిఫికేషన్లు వస్తాయి..
అంతకుముందు నుంచి పోటస్ సంబంధిత ఖాతాలను అనుసరిస్తున్న వారితో పాటు, ఎవరైతే.. ఇప్పుడు జో బైడెన్, కమలా హారిస్ ఖాతాలను అనుసరిస్తున్నారో వారికి నోటిఫికేషన్లు చేరుతాయి. దాని ఆధారంగా వారు పోటస్ ఖాతాలను అనుసరించాలో లేదో నిర్ణయం తీసుకుంటారు. బైడెన్ ప్రస్తుతం వినియోగిస్తున్న @PresElectBiden ఖాతా @POTUS గా మారిపోతుంది. అయితే.. ఇలా ఫాలోవర్లను ఉన్నది ఉన్నట్లుగా చేర్చకపోవడంపై బైడెన్ బృందం అసంతృప్తి వ్యక్తం చేస్తున్నట్లు తెలుస్తోంది.
నిర్ణయం వారిదే..
ట్విట్టర్ మాత్రం యూజర్లకు తమకు నచ్చిన వారిని ఫాలో అవ్వాలా? వద్దా? అనే నిర్ణయాన్ని తీసుకునే అవకాశాన్ని కల్పించామని చెబుతోంది. విదేశాల్లోనూ ఇదే విధానాన్ని అనుసరిస్తున్నామని ట్విట్టర్ ప్రితినిధి నిక్ పాసిలో తెలిపారు.
ట్రంప్కు చెందిన @POTUS ఖాతా ఇకపై @POTUS45 గా మారనుంది. అంతకుముందు ఒబామా పదవీకాలం ముగిసిన అనంతరం.. ఆయన వినియోగించిన ఖాతాను POTUS44 గా మార్చేసింది ట్విట్టర్. ఫేస్బుక్లో మాత్రం పోటస్ సంబంధిత ఖాతాలకు చెందిన అనుచరులు యథాతథంగా ఉండనున్నారు. ఫేస్బుక్లో అధికారిక వైట్ హౌస్ అధికారిక ఖాతాకు 11 మిలియన్ల పాలోవర్లు ఉన్నారు.
ట్రంప్నకు చెందిన పోటస్, ఆ సంబంధిత సామాజిక మాధ్యమ ఖాతాలు ఇటీవల పూర్తిగా నిషేధానికి గురికాగా.. బైడెన్కు కొత్త ఖాతాలు రానున్నాయి.
ఇదీ చూడండి:ట్రంప్కు ఫేస్బుక్, ట్విట్టర్ వరుస షాకులు
