Rajnikanth Rishab Setty: కన్నడ సినిమా 'కాంతార' సినిమా దేశవ్యాప్తంగా భారీ వసూళ్లను సాధించింది. మొదట కన్నడలో విడుదలైన ఈ సినిమా.. అక్కడ భారీగా విజయం సాధించడంతో ఇతర భాషల్లో కూడా రిలీజ్ చేశారు. విడుదలైన అన్ని చోట్లా ఈ సినిమా సూపర్ డూపర్ హిట్ అయింది. దీంతో రిషబ్ శెట్టి పేరు దేశవ్యాప్తంగా మారుమోగిపోయింది. ఈ సినిమాలో హీరోగా నటించడమే కాకుండా రచన, దర్శకత్వం కూడా రిషబ్ శెట్టినే చేయడం విశేషం.
అయితే 'కాంతార' సినిమాపై ఇప్పటికే హీరో ప్రభాస్, బాలీవుడ్ నటి కంగనా రనౌత్ తదితర సినీ ప్రముఖలు ప్రశంసల వర్షం కురిపించారు. రిషబ్ శెట్టి నటనకు ఫిదా అయ్యారు. తాజాగా రిషబ్ శెట్టికి తమిళ సూపర్స్టార్ రజనీకాంత్ నుంచి ప్రశంసలు మాత్రమే కాదు, ఖరీదైన బహుమతులు లభించాయి. రిషబ్ను చెన్నైలోని తన నివాసానికి రజనీ ఆహ్వానించి సత్కరించారు.
అంతేకాకుండా రిషబ్కు గోల్డ్ చైన్, గోల్డ్ లాకెట్ను బహుమతిగా అందించారు. కాంతార సినిమా చాలా బాగుందని, అద్భుతమైన సినిమాను తీశావంటూ రిషబ్ను ప్రశంసించారు. గతంలోనే రజనీ ఆ మూవీపై ప్రశంసలు కురిపించారు. ఈ సినిమా మాస్టర్ పీస్ అని, 50 ఏళ్లకోసారి గానీ ఇలాంటి సినిమాలు రావని, సినిమా తనకు గూస్ బంప్స్ తెప్పించిందంటూ ట్వీట్ చేశారు.
అయితే వీరిద్దరి కలయికపై అభిమానులు సోషల్మీడియాలో తెగ చర్చించుకుంటున్నారు. త్వరలో వీరిద్దరి కాంబోలో సినిమా ఉండబోతోందా? అనే టాక్ కూడా నడుస్తోంది. అందుకే రిషబ్ శెట్టిని రజనీ ఇంటికి ఆహ్వానించారని, భవిష్యత్ ప్రాజెక్టులపై వీరిద్దరూ కాసేపు ముచ్చటించారని సమాచారం.
