గ్లోబల్ స్టార్ రామ్ చరణ్, బాలీవుడ్ బ్యూటీ కియారా అడ్వాణీ జంటగా తెరకెక్కుతున్న లేటెస్ట్ మూవీ 'గేమ్ ఛేంజర్'. స్టార్ డైరెక్టర్ శంకర్ దర్శకత్వంలో వస్తున్న ఈ భారీ బడ్జెట్ సినిమా ఇప్పటికే పలు ప్రాంతాల్లో చిత్రీకరణను పూర్తి చేసుకుంది. పాన్ ఇండియా లెవెల్లో విడుదలవ్వనున్న ఈ సినిమాపై అటు శంకర్ మూవీ లవర్స్తో పాటు ఇటు రామ్చరణ్ ఫ్యాన్స్లో భారీ అంచనాలు ఏర్పడ్డాయి.
శరవేగంగా షూటింగ్ జరుపుకుంటున్న ఈ సినిమాను వచ్చే ఏడాది సంక్రాంతికి రిలీజ్ చేయనున్నట్లు గతంలో మూవీ నిర్మాత దిల్ రాజు ప్రకటించారు. అంతే కాకుండా ఇప్పటికే ఈ సినిమా షూట్స్ నుంచి లీకైన పలు ఫొటోలు.. అభిమానులకు మరిన్ని క్లూస్ ఇస్తూ సినిమాపై మరిన్ని అంచనాలు పెంచేస్తున్నాయి. అయితే ఇటీవల ఈ సినిమాకు సంబంధించి కీలక వ్యాఖ్యలు చేశారు నిర్మాత దిల్రాజు.
తాజాగా ఓ ఇంటర్వ్యూలో పాల్గొన్న ఆయన ఈ సినిమా గురించి ఆసక్తికర విషయాన్ని బయటపెట్టారు. అసలు మొదట్లో ఈ సినిమాను రామ్చరణ్తో కాకుండా వేరొక హీరోతో తీయాలని దర్శకుడు అనుకున్నారని తెలిపారు. "దర్శకుడు శంకర్ నాకు సినిమా మొదటి 45 నిమిషాల కథను వినిపించారు. మొదట్లో ఆయన ఈ సినిమాను పవన్ కల్యాణ్తో తీద్దామని అనుకున్నారు. ఆ విషయాన్ని నాకు చెప్పారు. కానీ నేను ఈ కథకు రామ్ చరణ్ అయితే బాగా సూట్ అవుతాడనిపించి చరణ్ను తీసుకోమని దర్శకుడికి చెప్పాను. ఆయన కూడా ఒప్పుకోవడంతో ఈ సినిమా అలా మొదలయ్యింది" అని తెలిపారు. ప్రస్తుతం ఆయన చేసిన వ్యాఖ్యలు నెట్టింట తెగ వైరలవుతున్నాయి.
'ఒక్కో పాటకు రూ.12 కోట్లు ఖర్చు'
ఇక 'గేమ్ ఛేంజర్' సినిమాలో ఒక్కో పాటకు రూ.10-12 కోట్లు ఖర్చు పెట్టామని దిల్రాజు తెలిపారు. ఐదు పాటలను ఐదు రకాలుగా షూట్ చేశామని అన్నారు. ఇప్పటికే ఈ సినిమా షూట్ 70 శాతం ముగిసిందని ఇక సెప్టెంబర్ కల్లా ఈ మూవీ కంప్లీట్ అవుతుందని స్పష్టం చేశారు. పొలిటికల్ థ్రిల్లర్గా తెరకెక్కుతున్న ఈ సినిమాలో రామ్ చరణ్, కియారా అడ్వాణీతో పాటు అంజలి, నవీన్ చంద్ర, శ్రీకాంత్, ఎస్ జే సూర్య, లాంటి స్టార్స్ కీలక పాత్రలు పోషిస్తున్నారు. ఈ చిత్రానికిి తమన్ మ్యూజిక్ను అందిస్తున్నారు. హైదరాబాద్లో చార్మినార్తో పాటు, కర్నూల్లోని కొండా రెడ్డి బురుజు లాంటి ఫేమస్ ఏరియాల్లోనూ ఈ సినిమా చిత్రీకరణ జరిగింది.
