ప్రస్తుతం తెలుగు చిత్రసీమలో పలు భారీ చిత్రాలు తెరకెక్కుతున్న సంగతి తెలిసిందే. వీటి కోసం అభిమానులు ఎంతో కాలంగా చాలా ఆసక్తిగా ఎదురుచూస్తున్నారు. కానీ వీటిలో చాలా చిత్రాలు ఈ ఏడాది ప్రేక్షకుల ముందుకు రావట్లేదు. ఎందుకంటే ఇవన్నీ అత్యంత భారీ బడ్జెట్తో భారీ హంగులతో రూపొందుతున్నాయి. వీటిని తెరకెక్కించేందుకు చాలా సమయం పట్టే అవకాశం ఉంది. అయితే వీటిలో కొన్ని మాత్రం వచ్చే ఏడాది వేసవికి విడుదలయ్యే అవకాశాలు కనిపిస్తున్నాయి.
వీటిలో ఒకటి పుష్ప 2. ఐకాన్ స్టార్ అల్లుఅర్జున్-సుకుమార్ కాంబినేషనల్లో రూపొందుతున్న చిత్రమిది. తొలి భాగం దేశవ్యాప్తంగా సూపర్ హిట్ కావడంతో రెండో భాగంగాపై భారీ అంచనాలే ఉన్నాయి. ఆ ప్రాజెక్ట్ ఇటీవలే షూటింగ్ ప్రారంభించుకుంది. రీసెంట్గా విశాఖపట్నంలో భారీ సెట్స్ను తీర్చిదిద్ది.. కథనాయకుడి పరిచయ సన్నివేశాలు, గీతం చిత్రీకరించారు. ఈ చిత్రం వచ్చే ఏడాది సమ్మర్ నాటికి తీసుకురావాలని మేకర్స్ ప్లాన్ చేస్తున్నారట.
మెగా పవర్స్టార్ రామ్‌చరణ్‌ - దిగ్గజ దర్శకుడు శంకర్ కాంబినేషన్‌లో రూ.200కోట్లకుపైగా బడ్జెట్తో రూపొందుతున్న ఆర్సీ 15 ప్రాజెక్ట్కు సంబంధించి కచ్చితమైన రిలీజ్ డేట్ బయటకు రావట్లేదు. అసలీ చిత్రాన్ని 2023 వేసవికి విడుదల చేయాలని భావించారు. కానీ ఆ తర్వాత దర్శకుడు శంకర్ ఏకకాలంలో యూనివర్సల్ స్టార్ కమల్హాసన్తో భారతీయుడు 2 సినిమా కూడా చేస్తుండటం వల్ల.. ఆర్ సీ 15 ఆలస్యమవుతూ వస్తోంది. ఇప్పుడీ చిత్రాన్ని 2024 సమ్మర్కు రిలీజ్ చేయాలని దర్శకనిర్మాతలు భావిస్తున్నట్లు సమాచారం.
ఇకపోతే టాలీవుడ్ మోస్ట్ వెయిటింగ్ చిత్రాల్లో ఎన్టీఆర్-కొరటాల.. NTR 30 ఒకటి. ఇంతవరకు సెట్స్పైకే వెళ్లలేదు. అయితే అప్డేట్స్ కోసం ఎంతో ఆసక్తిగా ఎదురుచూస్తున్న అభిమానుల కోసం ఇటీవలే ఎన్టీఆర్.. వారిపై కోపం వ్యక్తం చేస్తూ నోరు విప్పారు. ఈ చిత్రాన్ని ఈ నెల చివర్లో లేదా వచ్చే నెల మొదటి వారంలో సెట్స్పైకి తీసుకెళ్లబోతున్నట్లు వెల్లడించారు. ముందుగా చెప్పినట్టే అనుకున్న తేదీకే వచ్చే ఏడాది ఏప్రిల్ 5న అంటే వేసవికి రిలీజ్ చేస్తామని స్పష్టతనిచ్చారు.
ప్రస్తుతం వరుసగా భారీ సినిమాలను ప్రకటిస్తూ షూటింగ్లతో బిజీగా గడుపుతున్న పాన్ ఇండియా ప్రభాస్.. దర్శకుడు మారుతీతోనూ ఓ క్రేజీ ప్రాజెక్ట్ చేస్తున్న సంగతి తెలిసిందే. ఇంకా అధికారికంగా ప్రకటించని ఈ చిత్రం ప్రస్తుతం శరవేగంగా షూటింగ్ జరుపుకుంటోంది. హారర్ కామెడీ నేపథ్యంలో రాబోతున్న ఈ చిత్రాన్ని కూడా 2024 సమ్మర్కే ప్లాన్ చేస్తున్నారని తెలిసింది.
ఇదీ చూడండి: 'సార్' కలెక్షన్స్ బ్రేక్ ఈవెన్ టార్గెట్ కంప్లీట్.. 'వినరో భాగ్యము విష్ణు కథ'కు ఎంతంటే?
