Kangana Comments On Yash: కన్నడ రాకింగ్ స్టార్ యశ్ .. డైరెక్టర్ ప్రశాంత్ నీల్ కాంబోలో వచ్చిన చిత్రం 'కేజీఎఫ్ 2'. ప్రపంచవ్యాప్తంగా ఈ సినిమా ఎన్నో రికార్డులు సృష్టిస్తోంది. బ్రేకులు లేని బుల్డోజర్లా కలెక్షన్స్ పరంగా దూసుకుపోతుంది. యశ్ నటనకు.. ప్రశాంత్ నీల్ దర్శకత్వానికి సినీ ప్రియులు ముగ్దులైపోయారు. బాక్సాఫీస్ వద్ద 'కేజీఎఫ్ 2' సెన్సేషన్ క్రియేట్ చేస్తోంది. నార్త్లోనూ ఈ మూవీ కలెక్షన్ల వర్షం కురిపిస్తోంది. ప్రస్తుతం దేశవ్యాప్తంగా 'కేజీఎఫ్ 2' మేనియా కొనసాగుతోంది. కేవ‌లం నాలుగు రోజుల్లోనే రూ. 500 కోట్ల గ్రాస్ మైలురాయిని దాటి, కొత్త చరిత్రను లిఖించింది. ఇదిలా ఉంటే.. తాజాగా బాలీవుడ్ ఫైర్ బ్రాండ్ కంగనా రనౌత్.. కేజీఎఫ్ స్టార్ యశ్ గురించి ఆసక్తికర వ్యాఖ్యలు చేసింది.
ఇటీవల కాలంలో బాలీవుడ్ బ్యూటీ కంగనా రనౌత్.. సౌత్ ఇండియన్ స్టార్లపై తెగ ప్రశంసలు కురిపిస్తోంది. ఇప్పటికే రామ్చరణ్, ఎన్టీఆర్, అల్లు అర్జున్లను పొగడ్తలతో ముంచెత్తింది. ఇటీవల ఈ స్టార్ హీరోస్ పూజలు చేస్తున్న ఫోటోలను.. చరణ్, తారక్ మాలలు వేసుకున్న ఫోటోలను షేర్ చేస్తూ దక్షిణాది స్టార్స్ ఎంతో ఒదిగి ఉంటారని.. తమ సంస్కృతిని కాపాడుకోవడానికి ఎప్పుడూ ముందుంటారని చెప్పుకొచ్చింది. తాజాగా తన ఇన్స్టాలో యశ్ ఫోటోను షేర్ చేస్తూ ఇంట్రెస్టింగ్ కామెంట్స్ చేసింది. "కొన్నేళ్లుగా భారత చలనచిత్ర పరిశ్రమ మిస్ అవుతున్న 'యాంగ్రీ యంగ్ మ్యాన్' యశ్. అమితాబ్ బచ్చన్ తర్వాత 1970ల నుంచి ఆ స్థానం ఖాళీగానే ఉంది. ఇప్పుడు ఆ స్థానాన్ని యశ్ భర్తీ చేయబోతున్నాడు" అంటూ చెప్పుకొచ్చింది. 1970, 1980ల్లో డాన్, దీవార్, శక్తి, అగ్నిపథ్ వంటి చిత్రాలతో అమితాబ్ 'యాంగ్రీ యంగ్ మ్యాన్' అనే బిరుదును సంపాదించుకున్నారు.
ఇవీ చదవండి: 'అందులో ఆశ్చర్యమేంటి?'.. సౌత్ సినిమాలపై బీటౌన్ హీరో వ్యాఖ్యలు!
