Jeevitha rajasekhar emotional on Fake news: తెలుగు చిత్ర పరిశ్రమ పాలిట పలు సామాజిక మాద్యమాలు శాపంగా మారాయని తెలుగు చలనచిత్ర వాణిజ్య మండలి ఆవేదన వ్యక్తం చేసింది. వాటిని కట్టడి చేసి నటీనటుల వ్యక్తిగత గౌరవాన్ని కాపాడేందుకు కఠిన చర్యలు చేపట్టబోతున్నట్లు వాణిజ్య మండలి ప్రకటించింది. ఈ మేరకు అధ్యక్షుడు రామకృష్ణ ఆధ్వర్యంలో సమావేశమైన పలువురు దర్శక నిర్మాతలు... సామాజిక మాద్యమాల్లో వస్తోన్న అవాస్తవాలను తీవ్రంగా ఖండించారు. దర్శక నిర్మాతలు ఆది శేషగిరిరావు, జీవిత రాజశేఖర్, వీఎన్ ఆదిత్య, ఎన్. శంకర్, తమ్మారెడ్డి భరద్వాజ, మాదాల రవి, కాశీ విశ్వనాథ్ సహా ఇతర సినీ ప్రముఖులు హాజరై సామాజిక మాద్యమాల్లో విష ప్రచారంపై ఆగ్రహం వ్యక్తం చేశారు.
సినిమా వాళ్లంటే ఎందుకు అంత చులకనా అని ప్రముఖ దర్శక నిర్మాత తమ్మారెడ్డి భరద్వాజ ప్రశ్నించారు. నెగిటివ్ పబ్లిసిటీ చేసి క్యాష్ చేసుకోవాలనే తీరును మానుకోవాలని ఆయన విజ్ఞప్తి చేశారు. సామాజిక మాద్యమాల్లో తప్పుడు కథనాల వల్ల 25 ఏళ్లుగా తన కుటుంబం ఎంతో వేదన అనుభవిస్తుందని జీవిత రాజశేఖర్ వాపోయారు. తన కుమార్తెలపై అశ్లీలంగా, అసభ్యకరంగా థంబ్నెయిల్స్పై పెట్టి ప్రచారం చేస్తున్నారని ఆవేదన వ్యక్తం చేసిన జీవిత రాజశేఖర్... నిర్మాతల మండలి ఈ విషయంపై కఠినంగా వ్యవహారించాలని విజ్ఞప్తి చేశారు. సోషల్ మీడియాపై నియంత్రణకు ఫిల్మ్ చాంబర్ తీసుకునే నిర్ణయాలకు దర్శకుల సంఘం కట్టుబడి ఉంటుందని ఆ సంఘానికి అధ్యక్షుడిగా పనిచేస్తున్న కాశీ విశ్వనాథ్ తెలిపారు.
మంచిని ప్రోత్సహిస్తూ చెడును విమర్శించే స్థాయిలో సామాజిక మాద్యమాలు పనిచేయాలని ప్రముఖ నిర్మాత ఆది శేషగిరిరావు కోరారు. ఈ విషయంపై దృష్టిసారించాల్సిన ఫిల్మ్ చాంబర్ ఇన్నాళ్లు మౌనంగా ఉండటం వల్లే సమస్యలు ఉత్పన్నమవుతున్నాయని అభిప్రాయపడ్డారు. ఫిల్మ్ చాంబర్ కొంతమంది డబ్బులున్నవాళ్ల చేతుల్లోకి వెళ్లిపోయిందని ఆరోపించిన ఆదిశేషగిరిరావు... సామాజిక మాద్యమాలు, ఓటీటీలపై కేంద్ర, రాష్ట్ర ప్రభుత్వాలు నియంత్రణ అవసరం ఉందని పేర్కొన్నారు. అలాగే సినిమా టికెట్ ధరల విషయంలో నిర్మాత దిల్ రాజు చేసిన వ్యాఖ్యలను ఆదిశేషగిరిరావు పరోక్షంగా తప్పుపట్టారు.
సామాజిక మాద్యమాల నియంత్రణపై త్వరలోనే తెలుగు చిత్ర పరిశ్రమ పెద్దలు, నిర్మాతల మండలి సైబర్ క్రైమ్ నిపుణులతో ప్రత్యేకంగా సమావేశం కావాలని నిర్ణయించింది. అలాగే వ్యక్తిగత ప్రతిష్టను దెబ్బతీసే మాద్యమాలపై ఫిల్మ్ చాంబర్ తరపున న్యాయపరంగా పోరాటం చేయాలని భావిస్తోంది.
ఇదీ చూడండి: 'ఆర్‌ఆర్‌ఆర్‌'.. టైగర్ ఫైట్ ఎలా చిత్రీకరించారంటే?
