డీఆర్డీవో శాస్త్రవేత్త భూమిని తప్పుడు ఆధార్ సృష్టించి కాజేసేందుకు యత్నించిన వ్యక్తిపై రెవెన్యూ అధికారుల ఫిర్యాదుతో పటాన్చెరు పోలీసులు కేసు నమోదు చేశారు. సంగారెడ్డి జిల్లా పటాన్చెరు మండలం భానూరు గ్రామంలో 497 సర్వేనంబర్లో హైదరాబాద్కు చెందిన డీఆర్డీవో శాస్త్రవేత్త హనుమంతరావుకు 20 గుంటల భూమి ఉందని అధికారులు తెలిపారు. గతంలో ఆధార్ కార్డు లేకపోవడంతో రెవెన్యూ అధికారులు భూ యజమానికి పాసుపుస్తకాలు ఇవ్వలేదని పేర్కొన్నారు. మే నెలలో తానే హనుమంతరావును అంటూ ఆధార్ అప్డేట్ చేసుకుని పాసు పుస్తకాలు ఇవ్వాలని ఓ వ్యక్తి ఆన్లైన్లో దరఖాస్తు చేసుకున్నాడని వెల్లడించారు.
హనుమంతరావు భార్య కనకదుర్గ తన భర్త చనిపోయాడని... ఫౌతీ కోసం అదేసమయంలో ఆన్లైన్లో దరఖాస్తు చేసుకున్నట్లు తెలిపారు. రెండు దరఖాస్తులు రావడంతో రెవెన్యూ అధికారులు ఇద్దరినీ విచారణ కోసం పిలిపించారు. హనుమంతరావు భార్య చూపించిన పత్రాలు సరైనవిగా గుర్తించినట్లు వెల్లడించారు. రెండో వ్యక్తి మాత్రం రాకపోవడంతో రెవెన్యూ అధికారులు ఆధార్ సహాయంతో శోధించారు. చౌటుప్పల్కు చెందిన గుర్రం పాండుగా తనిఖీల్లో తేలిందని తహసీల్దార్ మహిపాల్ రెడ్డి పటాన్చెరు పోలీసులకు ఫిర్యాదు చేశారు. తప్పుడు ఆధార్తో భూమి కాజేయాలని ప్రయత్నించిన పాండుపై పలు సెక్షన్ల కింద కేసు నమోదు చేసినట్లు పోలీసులు తెలిపారు.
ఇదీ చదవండి: బైక్ను ఢీకొన్న కారు.. ఇద్దరికి గాయాలు
