సూర్యాపేటలో సంచలనం రేపిన రియల్ ఎస్టేట్ వ్యాపారి గుర్రం శశిధర్ రెడ్డి హత్యకేసును పోలీసులు ఛేదించారు. భూ వివాదాల కారణంగానే నల్గొండ జిల్లా నకిరేకల్కు చెందిన ఉప్పల శ్రీనివాస్ అనే స్థిరాస్తి వ్యాపారి సుపారీ ఇచ్చి హత్య చేయించినట్టు నిర్ధారించారు. ప్రత్యర్థి ఆచూకీని పసిగట్టేందుకు జీపీఎస్ వంటి అధునాతన పద్ధతులను ఉపయోగించి మరీ అంతమొందించినట్టు వెల్లడైంది. ఈ కేసులో 13 మంది నిందితులను అరెస్టు చేసిన పోలీసులు.. మారణాయుధాలను స్వాధీనం చేసుకున్నారు. మృతుడి భార్య భవానీ ఫిర్యాదుతో ఈ నెల 2న పోలీసులు నిందితులను అరెస్టు చేశారు. గతంలో శశిధర్ రెడ్డి హత్య చేసిన మొదటి భార్య బంధువులే చంపారని అందరూ భావించారు కానీ... భూ తగాదాలతోనే ప్రాణాలు తీసినట్టు సూర్యాపేట డీఎస్పీ మోహన్ కుమార్ వెల్లడించారు.
సూర్యాపేటకు చెందిన గుర్రం శశిధర్ రెడ్డి, నకిరేకల్కు చెందిన ఉప్పల శ్రీనివాసులు అలియాస్ ఆయిల్ శ్రీనుకు... కుడకుడ శివారులో కోట్ల విలువ చేసే భూములున్నాయి. ఉప్పల శ్రీనువాసులు రెండో భార్య పద్మశ్రీ పేరు మీద 7 ఎకరాల భూమి కొనుగోలు చేశాడు. కొంతకాలం తర్వాత ఇద్దరూ విడిపోయారు. ఈ అవకాశాన్ని ఆసరాగా చేసుకున్న శశిధర్ రెడ్డి... వివాదాస్పద భూమిని తక్కువ ధరకు పద్మశ్రీ నుంచి కొనుగోలు చేశాడు. దీంతో శ్రీనువాసులు, శశిధర్ రెడ్డిపై కక్ష పెంచుకున్నాడు. అంతే కాకుండా తన భూమిని కూడా ఆక్రమించుకొని బెదిరింపులకు పాల్పడుతున్నాడని... పెద్ద మనుషుల సమక్షంలో పలుమార్లు పంచాయితీ కూడా పెట్టారు. కానీ కొలిక్కి రాలేదు.
పెద్ద మనుషులు చెప్పినా వినడం లేదని... మద్దిరాల మండలం చిన్న నెమిలకు చెందిన తన స్నేహితుడు షేక్ జానీతో శ్రీనివాసులు చెప్పాడు. ఇద్దరు కలిసి శశిధర్ రెడ్డి హత్యకు పథకం రచించారు. గతంలో వరంగల్లో లారీ డ్రైవర్గా పనిచేసిన జానీ... వరంగల్కు చెందిన ఇడ్లీ రమేష్, గొట్టిముక్కల రాజిరెడ్డి, మేకల రమేష్, మేదరి వేణు, పంగ రవి, మేకల ప్రవీణ్తో మాట్లాడి సుపారీ ఇచ్చారు. ఒక్కొక్కరికి రూ. లక్ష, 120 గజాల ఇంటి స్థలం ఇచ్చే విధంగా ఒప్పందం కుదుర్చుకున్నారు. వీరికి సూర్యాపేటలోని శ్రీనివాస్ ఇంట్లో వసతి ఏర్పాటు చేశారు. ఒప్పందం చేసుకున్న రోజు నుంచే... శశిధర్ రెడ్డి కదలికలపై నిఘా పెట్టారు. ఒక ఆటో, రెండు స్కూటీలతో రెక్కి నిర్వహించారు. పలుమార్లు తారసపడినప్పటికీ హత్యకు వీలు కాలేదు.
మూడుసార్లు విఫలమవడంతో... ఇలా సాధ్యం కావడం లేదని గ్రహించి శశిధర్ రెడ్డి కారుకు రహస్యంగా జీపీఎస్ ట్రాకర్ను అమర్చారు. ఎప్పటికప్పుడు శశిధర్ రెడ్డి కదలికలను గమనిస్తూ... ఈ నెల 2న సాయంత్రం పొలం వద్దకు వెళ్లడాన్ని గమనించారు. అక్కడికి చేరుకున్న దుండగులు శశిధర్ రెడ్డి ఫోన్ మాట్లాడుతుండగా... కళ్లలో కారం చల్లి వేట కొడవళ్లతో నరికారు. నిందితుల ఫోన్కాల్స్ ఆధారంగా పట్టకున్న పోలీసులు... కత్తులు, వేట కొడవళ్లు, ఆటో, రెండు స్కూటీలు, జీపీఎస్ యంత్రం, 16 మొబైల్స్ స్వాధీనం చేసుకున్నారు. చాకచక్యంగా కేసును ఛేదించిన పోలీసులను డీఎస్పీ మోహన్ కుమార్ అభినందించారు.
ఇదీ చూడండి: ఔటర్ రింగ్‌రోడ్‌పై ప్రమాదం.. 25 మందికి గాయాలు
