తితిదే సప్తగిరి మాసపత్రిక నిర్వాహకులు మరో వివాదంలో చిక్కుకున్నారు. సప్తగిరి మాస పత్రికతో పాటు అన్యమత పుస్తకాన్నీ పోస్టులో తమకు పంపారని ఆంధ్రప్రదేశ్లోని గుంటూరుకు చెందిన ఓ భక్తుడు వెల్లడించారు. నగరంలోని మల్లిఖార్జునపేటకు చెందిన రాఘవరావు... సప్తగిరి మాసపత్రిక చందాదారు. జులై నెలకు సంబంధించిన పత్రిక సోమవారం ఉదయం వచ్చింది. అతని ఇంటి గేటు వద్ద పోస్టుమేన్ దానిని పెట్టి వెళ్లారు. కవరు తెరచి చూడగా సప్తగిరి మాసపత్రికతోపాటు అన్యమతానికి చెందిన సజీవ సువార్త అనే మరో బుక్లెట్ వచ్చిందని రాఘవరావు బంధువు విష్ణు తెలిపారు.
తాము పవిత్రంగా పూజించే వేంకటేశ్వరుడు కొలువైన తిరుమల నుంచి ఇలాంటి పుస్తకం రావటం ఆశ్చర్యానికి గురయ్యామని చెప్పారు. ఈ వ్యవహారంపై తితిదే విజిలెన్స్ విభాగానికి ఫిర్యాదు చేశామని వెల్లడించారు. ఘటనపై సమగ్ర విచారణ విచారణ చేయించాలని రాఘవరావు కుటుంబీకులు డిమాండ్ చేశారు.
అయితే... సజీవ సువార్త పుస్తకంపై మహిళ పేరుతో చిరునామా ముద్రించి ఉంది. కానీ తితిదేకు సంబంధించిన కవర్లో సప్తగిరి మాసపత్రికతో పాటు ఆ పుస్తకం ఎలా జత కలిసిందన్నదే ఇక్కడ అర్థం కాని పరిస్థితి. పోస్టల్ శాఖ వాళ్ల పొరపాటు ఏమైనా ఉందా అనే కోణంలోనూ విచారణ జరపాల్సిన అవసరం ఉందని కొందరు అభిప్రాయపడుతున్నారు. కారణం ఏదైనా.. బాధ్యులపై కఠిన చర్యలు తీసుకోవాలని భక్తులు డిమాండ్ చేస్తున్నారు.
ఇదీ చదవండి:
