దిల్లీ వెళ్లిన మంత్రుల బృందం..

Telangana Ministers Delhi Tour: మంత్రుల బృందం దిల్లీకి వెళ్లింది. ధాన్యం కొనుగోళ్లు చేయాలని కేంద్రంపై ఒత్తిడి తేనుంది. రేపు కేంద్ర మంత్రి, ప్రధాన మంత్రి, సంబంధిత అధికారులను కలుస్తామని మంత్రులు తెలిపారు. కేంద్ర ప్రభుత్వంతో తాడో పేడో తేల్చుకొని వస్తామని స్పష్టం చేశారు.

Telangana Ministers Delhi Tour: సీఎం కేసీఆర్ ఆదేశాల మేరకు మంత్రులు నిరంజన్ రెడ్డి, గంగుల కమలాకర్, పువ్వాడ అజయ్ కుమార్ దిల్లీ వెళ్లారు. యసంగి వరి దాన్యం కొనుగోలుపై కేంద్ర మంత్రులను కలవనున్నారు. రాష్ట్ర భాజపా అధ్యక్షుడు మాట్లాడిన మాటలు అర్థరహితమని వ్యవసాయ శాఖ మంత్రి నిరంజన్​ రెడ్డి అన్నారు. వరి దాన్యం కొనుగోలుపై ఏమైనా మాట్లాడితే ఆ శాఖ మంత్రి, లేదంటే సంబంధిత అధికారులు మాట్లాడాలని బండి సంజయ్​కి ఎం సంబంధమని ప్రశ్నించారు. ఒకవేళ కేంద్ర ప్రభుత్వం తరఫున మాట్లాడితే స్పష్టమైన హామీతో మాట్లాడాలని.. ఇష్టం వచ్చినట్లు కాదని స్పష్టం చేశారు.

పంజాబ్ రాష్ట్రంలో ఏ విధంగా అయితే ధాన్యం కొంటున్నారో ఇక్కడ కూడా అదేవిధంగా కొనుగోలు చేయాలని నిరంజన్ రెడ్డి డిమాండ్ చేశారు. ఈ వడ్లనే కొంటాం ఆ వడ్లనే కొంటాం అంటే ఎలా అని ప్రశ్నించారు. సీఎం కేసీఆర్​పై ఇష్టం వచ్చినట్లు మాట్లాడం సరికాదని అన్నారు. బండి సంజయ్​ రాష్ట్రం కోసం ఎం చేస్తున్నారు? రాష్ట్రానికి ఎం ఒరిగిందని నిలదీశారు.

కేంద్ర తీరువల్ల తెలంగాణ రైతులు తీవ్ర ఇబ్బందులకు గురవుతున్నారని మంత్రి గంగుల కమలాకర్ అన్నారు. రేపు కేంద్ర మంత్రి, ప్రధాన మంత్రి, సంబంధిత అధికారులను కలుస్తామని తెలిపారు. రాష్ట్రంలో రైతులు పండించిన వరి ధాన్యం మొత్తం కొనుగోలు చేయాలని డిమాండ్ చేశారు. ఏ రాష్ట్రంలో లేని ఇబ్బందులు మన రాష్ట్ర రైతులకు ఎందుకు పెడుతున్నారని ప్రశ్నించారు. వన్ నేషన్ వన్ ప్రోక్యూర్​మెంట్ ఉండాలని అన్నారు.

పంజాబ్​లో ధాన్యం కొన్నప్పుడు... తెలంగాణ రైతులు పండిస్తే ఎందుకు కొనరని నిలదీశారు. బాయిల్డ్ రైస్ పరిచయం చేసిందే ఎఫ్​సీఐ అని... ఇప్పుడు ఎందుకు కొనడం లేదని అన్నారు. కేంద్ర ప్రభుత్వంతో తాడో పేడో తేల్చుకొని వస్తామని స్పష్టం చేశారు. కేంద్ర ప్రభుత్వం నుంచి సానుకూలంగా స్పందన రాకపోతే ఎం చేయాలో సీఎం కేసీఆర్ నిర్ణయిస్తారని చెప్పారు.

ఇదీ చదవండి : 'కేంద్రం కొంటానంటున్నా కేసీఆర్ సహకరించట్లేదు'