భారత అంతరిక్ష పరిశోధన సంస్థ ఇస్రో..... మరో ప్రతిష్ఠాత్మక ప్రయోగానికి సిద్ధమైంది. పొట్టిశ్రీరాములు నెల్లూరు జిల్లా శ్రీహరికోట నుంచి ఇవాళ ఉదయం 9 గంటల 28 నిమిషాలకు కార్టోశాట్-3 ఉపగ్రహాన్ని అంతరిక్షంలోకి పంపనుంది. కార్టోశాట్-3 ఉపగ్రహంతో పాటు అమెరికాకు చెందిన మరో 13 నానో ఉపగ్రహాలను పీఎస్ఎల్వీ- సీ47 వాహకనౌక నింగిలోకి తీసుకెళ్లనుంది.
ఈ ప్రయోగానికి మంగళవారం ఉదయం 7 గంటల 28 నిమిషాలకు కౌంట్ డౌన్ ప్రక్రియ ప్రారంభమైంది. మూడో తరానికి చెందిన హై రెజల్యూషన్‌ ఎర్త్‌ ఇమేజింగ్‌ ఉపగ్రహంగా కార్టోశాట్-3ని రూపొందించారు. దీని జీవిత కాలం ఐదేళ్లు. కార్టోశాట్-3 బరువు సుమారు 1,6 వందల 25 కిలోలు. పట్టణ అభివృద్ధి ప్రణాళిక, గ్రామీణ వనరులు, మౌలిక వసతుల అభివృద్ధి, తీరప్రాంత వినియోగంలో ఈ ఉపగ్రహం సేవలందించనుంది. వీటితో పాటు ఉగ్రవాద శిబిరాలకు సంబంధించిన ఫొటోలను మరింత జూమ్‌ చేసి తీసే వీలు కలుగుతుంది.
