'భైంసాలో ప్రజలింకా భయంతోనే బతుకుతున్నారు'

భైంసా అల్లర్లకు మతం రంగు పులిమి ఘటనను పక్కదారి పట్టించేలా కొంతమంది చూస్తున్నారని జాతీయ బాలల హక్కుల పరిరక్షణ కమిషన్ సభ్యురాలు ప్రజ్ఞా పరాండే అన్నారు. ఆమె భైంసాలో పర్యటించారు. హైదరాబాద్​లో ఆ వివరాలు తెలిపారు.

నిర్మల్‌ జిల్లా భైంసాలో చోటుచేసుకున్న ఘటన మానవత్వాన్ని అపహాస్యం చేసేలా ఉందని జాతీయ బాలల హక్కుల పరిరక్షణ కమిషన్‌ సభ్యురాలు ప్రజ్ఞా పరాండే అన్నారు. దీనిపై సమగ్ర విచారణ జరపాల్సిన అవసరం ఉందన్నారు. ఆమె సోమవారం భైంసాలో పర్యటించిన అనంతరం, రాత్రి హైదరాబాద్‌లో అక్కడి పరిస్థితుల గురించి వివరించారు. ఘటనకు మతం రంగు పులిమి పక్కదారి పట్టిస్తున్నారనే.. అనుమానం కలుగుతోందని ఆమె అభిప్రాయపడ్డారు.

24 గంటల తర్వాత కూడా దాడులా?

భైంసాలో ఇరుపక్షాలతో మాట్లాడానని తెలిపారు. వారిలో ఘటన తాలూకు భయం ఇంకా పోలేదన్నారు. ఇది రెండు వర్గాల మధ్య జరిగిన ఘటన కాకుండా, రాజకీయ లబ్ధి కోసం ఇతరులు చేసినట్లుగా కనిపిస్తోందని సందేహం వ్యక్తం చేశారు. ఘటన జరిగిన 24 గంటల తర్వాత కూడా దాడులు కొనసాగాయంటే ప్రభుత్వ నిర్లక్ష్యం కనిపిస్తోందన్నారు.

కొందరు అమాయకులు

భైంసా ఘటనలో 70 మందిని పోలీసులు అరెస్టు చేయగా... వారిలో ఇరువర్గాలకు చెందిన కొందరు అమాయకులు ఉన్నారన్నారు. నిజంగా నేరం చేసిన వాళ్లు మాత్రం బయటే ఉన్నట్లు తెలుస్తోందని తెలిపారు. జనవరి 12న ఘటన జరిగితే ఎన్నికల కోడ్‌ పేరుతో 22 దాకా ఎవరూ స్పందించకపోవడాన్ని ఆమె తప్పుపట్టారు. కమిషన్‌ తరఫున కేంద్రానికి నివేదిక ఇవ్వనున్నట్లు ప్రజ్ఞా పరాండే పేర్కొన్నారు.

ఇదీ చూడండి : అక్బరుద్దీన్ ఓవైసీపై దాడి కేసులో నిర్దోషి పహిల్వాన్ మృతి