చిత్తూరు జిల్లా చంద్రగిరి మండలం కందులవారిపల్లిలో విషాదం నెలకొంది. గుండెపోటుతో తమ్ముడు మృతి చెందాడన్న వార్త తెలుసుకున్న అన్న తన ప్రాణాలొదిలాడు. గ్రామానికి చెందిన సుబ్రహ్మణ్యం అలియాస్‌ బాబు (50)... వెంకటరామయ్య (47) ఇద్దరూ అన్నదమ్ములు. సుబ్రహ్మణ్యం గ్రామంలో ఉంటూ వ్యవసాయం చేసుకొని జీవిస్తున్నాడు. తమ్ముడు వెంకటరామయ్య తిరుపతిలో ఎల్ఐసీ ఏజెంట్‌గా పనిచేస్తూ స్వగ్రామం వచ్చి పొలం పనులు చూసుకునేవాడు.
ఒకరి వెంట మరొకరు...
ఈ క్రమంలో స్వగ్రామానికి చేరుకొన్న వెంకట్రామయ్య... ఉదయం పొలం పనులకు వెళ్లి మధ్యాహ్నానికి ఇంటికి వచ్చాడు. ఆ వెంటనే గుండెల్లో నొప్పిగా ఉందంటూ కుప్పకూలిపోయాడు. స్పందించిన స్థానికులు 108 వాహనంలో హుటాహుటిన తిరుపతికి తరలించారు. అప్పటికే ఆయన మృతి చెందినట్లు వైద్యులు తెలిపారు. సొదరుడి మరణ వార్త విన్న అన్న సుబ్రమణ్యం... హఠాత్తుగా కుప్పకూలాడు. అనంతరం పరీక్షించగా ప్రాణాలు కోల్పోయాడు. ఓకేసారి అన్నదమ్ములిద్దరి మరణం గ్రామంలో విషాదఛాయలు నింపాయి.
