కృష్ణా జలాల వివాదం పరిష్కారానికి బ్రిజేష్ కుమార్ ట్రైబ్యునల్ ఏర్పాటైంది. తెలుగు రాష్ట్రాల వాదనలపై ట్రైబ్యునల్ విచారణ చేపట్టింది. తెలంగాణకు ఎక్కువ నీటిని కేటాయించాల్సిన అవసరాన్ని పేర్కొంటూ దాఖలైన ఓ అఫిడవిట్కు సంబంధించి వాదనలు జరుగుతున్నాయి. ఛైర్మన్ బ్రిజేశ్‌కుమార్ ధర్మాసనం ముందు విచారణ జరిగింది. తెలంగాణ తరపున సాక్షిగా ఉన్న సీడబ్ల్యూసీ మాజీ చైర్మన్ ఘన్ శ్యామ్ను ఏపీ ప్రభుత్వం తరపు సీనియర్ న్యాయవాది క్రాస్ ఎగ్జామినేషన్ చేశారు. కరోనా, న్యాయమూర్తి రాజీనామా కారణంగా దాదాపు ఏడాదిన్నర తర్వాత బ్రిజేష్ కుమార్ ట్రైబ్యూనల్ బుధవారం విచారణ ప్రారంభించింది.
బుధ, గురు శుక్రవారాల్లో కొనసాగిన క్రాస్ ఎగ్జామినేషన్లో నాగర్జున సాగర్ ప్రాజెక్టు, కేసీ కెనాల్, పోలవరం ప్రాజెక్టులో భాగంగా నిర్మించిన పట్టిసీమ ఎత్తిపోతలపై ప్రశ్నలకు ఘన్శ్యామ్ సమాధానం ఇచ్చారు. శుక్రవారం జరిగిన క్రాస్ ఎగ్జామినేషన్లో పోలవరం ప్రాజెక్టు పూర్తయ్యే వరకు కృష్ణా డెల్టాకు నీరందించేందుకు నిర్మించిన పట్టిసీమ ఎత్తిపోతల పథకంపై క్రాస్ ఎగ్జామినేషన్ జరిగింది. తదుపరి క్రాస్ ఎగ్జామినేషన్ను వచ్చే నెల 28, 29, 30 తేదీలకు వాయిదా వేస్తున్నట్లు బ్రిజేష్ కుమార్ తెలిపారు.
ఇదీ చదవండి: ఇది ప్రజాకర్షక బడ్జెట్.. అన్నివర్గాలకు న్యాయం: పువ్వాడ
