చీపుర్లకు చేతిపిడిగా ప్లాస్టిక్‌కు బదులు ఈశాన్యరాష్ట్రాల్లో విరివిగా దొరికే వెదురును ఉపయోగించేలా ప్రణాళిక రూపొందించి అమలు చేస్తున్నారు బ్యాచ్‌ ఐఎఫ్‌ఎస్‌ అధికారి వడ్డారపు ప్రసాదరావు. స్థానికంగా ఉండే గడ్డితోపాటు, విస్తృతంగా లభించే వెదురును ఉపయోగించుకొని గిరిజనులతో కొత్త తరహా పర్యావరణహిత చీపుర్ల తయారీని ‘వన్‌ధన్‌ వికాస్‌’ కార్యక్రమం కింద ప్రసాదరావు ప్రోత్సహిస్తున్నారు.
ఏటా 4లక్షల చీపుర్లు తయారు చేయించి తక్కువ ధరకే వినియోగదారులకు అందజేసే దిశగా ఆయన కృషి చేస్తున్నారు. దేశంలోని 20 కోట్ల కుటుంబాలు వాడుతున్న చీపుర్లకు పిడి కోసం దాదాపు 40 వేల మెట్రిక్‌ టన్నుల ప్లాస్టిక్‌ వినియోగిస్తున్నట్లు అంచనా. ఈశాన్య రాష్ట్రాల్లో దొరికే వెదురు ప్లాస్టిక్‌లాగానే తేలికగా ఉండి.. చీపురు పిడిగా ఉపయోగించడానికి అనువుగా ఉంటుందని ప్రసాదరావు తెలిపారు.
