Adani Acquires Majority Stake In News Agency IANS : భారతదేశానికి చెందిన ప్రముఖ వ్యాపారవేత్త, అపరకుబేరుడు గౌతమ్ అదానీ మీడియా రంగంలోనూ తమ ఉనికిని మరింత విస్తరిస్తున్నారు. తాజాగా ఆయనకు చెందిన ఏఎంజీ మీడియా నెట్వర్క్ లిమిటెడ్ (AMNL) ప్రముఖ న్యూస్ ఏజెన్సీ 'ఐఏఎన్ఎస్ ఇండియా ప్రైవేట్ లిమిటెడ్' (IANS)లో మెజారిటీ వాటాను కొనుగోలు చేసింది.
సగానికి పైగా కొనేశారు..
అదానీ ఎంటర్ప్రైజెస్ రెగ్యురేటరీ ఫైలింగ్లో, తమ అనుబంధ సంస్థ అయిన ఏఎంజీ మీడియా నెట్వర్క్ లిమిటెడ్ (AMNL) - ఐఏఎన్ఎస్ ఇండియా ప్రైవేట్ లిమిటెడ్ (IANS)లో 50.50 శాతం వాటాను కొనుగోలు చేసినట్లు పేర్కొంది. అయితే ఎంత మొత్తానికి ఈ డీల్ కుదిరిందో తెలియజేయలేదు.
ఏడాది క్రితమే మీడియా రంగంలోకి..
గౌతమ్ అదానీ గతేడాది మార్చిలో 'క్వింటిలియన్ బిజినెస్ మీడియా'ను కొనుగోలు చేసి మీడియా వ్యాపారంలోకి అడుగు పెట్టారు. ఇది బిజినెస్ అండ్ ఫైనాన్సియల్ న్యూస్ డిజిటల్ మీడియా ప్లాట్ఫారమ్ బీక్యూ ప్రైమ్ను నిర్వహిస్తుంది. అదానీ అక్కడితో ఆగకుండా గతేడాది డిసెంబర్లోనే ఎన్డీటీవీలో 65 శాతం వాటాను కొనుగోలు చేశారు. వాస్తవానికి దీనిని కూడా AMNL ద్వారానే కొనడం జరిగింది. అదానీ గ్రూప్ తాజాగా IANS న్యూస్ ఏజెన్సీని కూడా కొనుగోలు చేసి, తమ మీడియా వ్యాపారాన్ని మరింత విస్తరించింది.
లాభాల్లోని సంస్థనే కొనుగోలు చేశారు!!!
ఐఏఎన్ఎస్ 2022-23 ఆర్థిక సంవత్సరంలో రూ.11.86 కోట్లు మేరకు రెవెన్యూను సంపాదించింది. ఇలా మంచి లాభాలు సంపాదిస్తున్న సంస్థలో అదానీ గ్రూప్ ఏకంగా 50 శాతానికి పైగా వాటా కొనుగోలు చేయడం విశేషం. దీనితో ఐఏఎన్ఎస్లో కార్యనిర్వహణ బాధ్యతలు ఏఎంఎన్ఎల్ ఆధ్వర్యంలోకి వచ్చాయి. దీనితో పాటు IANS సంస్థలో డైరెక్టర్లను నియమించే హక్కు కూడా AMNLకు దఖలు పడింది. అంటే ఐఏఎన్ఎస్ అనేది ఏఎంఎన్ఎల్ అనుబంధ సంస్థ అయ్యింది.
అదానీ వ్యాపార సామ్రాజ్యం విస్తరిస్తోంది..
Adani Group Company List : అదానీ 1988లో ఒక సాధారణ సరుకల వ్యాపారిగా (కమొడిటీ ట్రేడర్)గా జీవితాన్ని ప్రారంభించారు. తరువాత 13 ఓడరేవులను, 8 విమానాశ్రయాలను తమ ఆధీనంలోకి తీసుకుని.. భారత ఇన్ఫ్రాస్ట్రెక్చర్ రంగంలోని అతిపెద్ద ప్రైవేట్ వ్యాపారవేత్తగా నిలిచారు. అలాగే ఆయన కోల్, ఎనర్జీ డిస్ట్రిబ్యూషన్, డేటా సెంటర్స్ సహా, ఇటీవల సిమెంట్, రాగి ఉత్పత్తి రంగాల్లోకి కూడా తమ బిజినెస్ను విస్తరించారు. అంతేకాదు త్వరలో ప్రైవేట్ నెట్వర్క్ను ఏర్పాటు చేసేందుకు 5జీ టెలికాం స్పెక్ట్రమ్ను కూడా కొనుగోలు చేశారు. ఈ విధంగా అదానీ అంచెలంచెలుగా తమ వ్యాపార సామ్రాజ్యాన్ని విస్తరిస్తూనే ఉన్నారు.
డెబిట్ కార్డ్తో ఫ్రీగా ఇన్సూరెన్స్ కవరేజ్! ఎలా క్లెయిమ్ చేసుకోవాలంటే?
తరచూ ప్రయాణాలు చేస్తుంటారా? ట్రావెల్ ఇన్సూరెన్స్ తప్పనిసరి - ఎందుకంటే?
