'సానుకూలతలు కనిపిస్తున్నాయ్​- ఇదే సంకేతం'

దేశ ఆర్థిక వ్యవస్థ క్రమంగా పుంజుకుంటోందని కేంద్ర ఆర్థిక శాఖ సహాయ మంత్రి అనురాగ్​ ఠాకూర్ వెల్లడించారు. 'వి' ఆకారపు రికవరీ కోసం దేశం ఎదురు చూస్తోందని తెలిపారు. సాంకేతిక మాంద్యం నుంచి దేశం కోలుకుందని మంత్రి అభిప్రాయపడ్డారు.

ఆర్థిక వ్యవస్థలోని పలు రంగాల్లో ఇప్పటికే సానుకూల సంకేతాలు కనిపిస్తున్నాయని, దేశం 'వి' ఆకారపు రికవరీ కోసం ఎదురుచూస్తోందని ఆర్థిక శాఖ సహాయ మంత్రి అనురాగ్​ ఠాకూర్​ పేర్కొన్నారు. ఫిబ్రవరిలో రూ.25,787 కోట్ల విదేశీ పోర్ట్​ఫోలియో నిధులు(ఎఫ్​పీఐ) తరలిరావడాన్ని ఆయన ఉదహరించారు.

పెరిగిన విదేశీ మారక నిల్వలు..

ముంబయిలో శనివారం జరిగిన ఓ కార్యక్రమంలో వర్చువల్​గా​ మాట్లాడిన మంత్రి.. రెండు వరుస త్రైమాసికాల్లో జీడీపీ క్షీణించిన తర్వాత అక్టోబరు-డిసెంబరులో 0.4శాతం వృద్ధిని సాధించి సాంకేతిక మాంద్యం నుంచి దేశం బయటపడిందని తెలిపారు. దేశ విదేశీ మారక నిల్వలు గత కొద్ది నెలలుగా స్థిరంగా పెరుగుతున్నాయని, 2021 జనవరిలో ఆల్​టైం గరిష్ఠ స్థాయి అయిన 590 బిలియన్​ డాలర్ల మేర పెరిగినట్లు తెలిపారు.

'ఈ సానుకూల సంకేతాలు విశ్వాసాన్ని ఇస్తున్నాయి. అంతర్జాతీయ ఫండ్​లు, పెట్టుబడుదార్లు మన దేశాన్ని పెట్టుబడులకు గమ్యస్థానంగా భావిస్తున్నాయి. భారత వృద్ధిపై బులిష్​(ఆసక్తి)గా' ఉన్నారని చెప్పుకొచ్చారు.

ఇదీ చదవండి: జీడీపీతో పోలిస్తే 267 శాతం అధికంగా అప్పులు!