కీలక వడ్డీ రేట్లలో ఎలాంటి మార్పులు చేయకూడదని ద్రవ్య పరపతి విధాన కమిటీ (ఎంపీసీ) సమీక్షలో నిర్ణయం తీసుకున్నట్లు ఆర్బీఐ బుధవారం ప్రకటించింది. దీనితో రెపో రేటు 4 శాతం వద్ద, రివర్స్ రెపో రేటు 3.3 శాతం వద్ద యథాతథంగా ఉండనున్నాయి. వడ్డీ రేట్లలో మార్పు లేకపోవడం వరుసగా ఇది ఐదోసారి. రిటైల్‌ ద్రవ్యోల్బణాన్ని 4 శాతానికి పరిమితం చేయాలన్న ప్రభుత్వ లక్ష్యానికి అనుగుణంగా ఆర్బీఐ ఈ నిర్ణయం తీసుకుంది.
సమీక్ష ముఖ్యాంశాలు..
- ప్రస్తుత ఆర్థిక సంవత్సరం (2021-22) దేశ వృద్ధి రేటు అంచనా 10.5 శాతం
- కరోనా కేసులు పెరుగుతున్న నేపథ్యంలో సర్దుబాటు వైఖరి కొనసాగింపు
- 2021-21 ప్రథమార్ధంలో ద్రవ్యోల్బణం 5.2 శాతంగా ఉండొచ్చని అంచనా. మూడో త్రైమాసికంలో 4.4 శాతానికి పరిమితమయ్యే అవకాశం
- 2021-22లో తాజా రుణాల కోసం నాబార్డ్, ఎన్‌హెచ్‌బీ, ఎస్‌ఐడీబీఐకి రూ.50 వేల కోట్ల అదనపు లిక్విడిటీ సౌకర్యం
- రాష్ట్రాలకిచ్చే స్థూల చేబదుళ్ల(వేస్‌ అండ్‌ మీన్స్‌ అడ్వాన్సెస్‌) పరిమితిని రూ.47,010 కోట్లకు పెంపు
- కొవిడ్‌ సంక్షోభం నుంచి బయటపడేందుకు మధ్యంతర రూ.51,560 కోట్ల చేబదుళ్ల కాలపరిమితిని సెప్టెంబరు వరకు పొడిగింపు
- వ్యవస్థలో సరిపడా ద్రవ్యలభ్యత ఉండేలా ఆర్బీఐ చర్యలు
- ఆస్తుల పునర్నిర్మాణ కంపెనీలు (ఏఆర్సీ)ల పనితీరును సమీక్షించేందుకు కమిటీ ఏర్పాటు
- పేమెంట్స్ బ్యాంకుల్లో వ్యక్తిగత ఖాతాదారుల రోజువారీ నగదు పరిమితి రూ.లక్ష నుంచి రూ.2 లక్షలకు పెంపు
ఇదీ చదవండి:'2021లో 12.5 శాతానికి దేశ జీడీపీ'
