ప్రస్తుత ఆర్థిక సంవత్సరం భారత వృద్ధి రేటు క్షీణత 7.4 శాతంగా నమోదవ్వొచ్చని భారతీయ స్టేట్ బ్యాంక్ (ఎస్బీఐ) తాజా నివేదిక వెల్లడించింది. కరోనా విజృంభణ తీవ్ర స్థాయిలో ఉన్నప్పుడు విడుదల చేసిన నివేదికలో.. 2020-21లో భారత వృద్ధి రేటు -10.9 శాతం ఉండొచ్చని ఎస్బీఐ అంచనా వేయడం గమనార్హం.
ఊహించినదానికన్నా మెరుగ్గా ఆర్థిక వ్యవస్థ పుంజుకుంటున్న నేపథ్యంలో వృద్ధి రేటు క్షీణత అంచనాలను ఎగువకు సవరించినట్లు ఎస్బీఐ నివేదిక పేర్కొంది. ఈ సానుకూలతల ఆధారంగా 2021-22లో భారత్ ఏకంగా 11 శాతం వృద్ధి రేటును నమోదు చేయొచ్చని ఆశాభావం వ్యక్తం చేసింది.
ఆర్థిక వ్యవస్థను ప్రధానంగా ప్రభావితం చేసే పరిశ్రమ, సేవా రంగం పనితీరు సహా మొత్తం 41 సూచీల ఆధారంగా వృద్ధి రేటును అంచనా వేసినట్లు వివరించింది ఎస్బీఐ నివేదిక. మొత్తం 41 సూచీల్లో 58 శాతం.. ప్రస్తుత ఆర్థిక సంవత్సరం మూడో త్రైమాసికంలో సానుకూల వృద్ధి రేటు నమోదవుతుందని సూచించినట్లు వెల్లడించింది. క్యూ4 అంచనాలూ సానుకూలంగా ఉన్నట్లు తెలిపింది. అయితే కరోనా విజృంభణ మళ్లీ పెరిగితే ఈ అంచనాల్లో మార్పులు ఉండొచ్చని స్పష్టం చేసింది.
ఇవీ చూడండి:
