కరోనా మహమ్మారి విజృంభణ, దేశవ్యాప్త లాక్డౌన్తో ఆదాయ నష్టాన్ని ఎదుర్కొంటున్న రాష్ట్రాలకు ఉపశమనం కలిగించింది కేంద్ర ప్రభుత్వం. వస్తు సేవల పన్ను (జీఎస్టీ) వసూళ్లలో ఆదాయ నష్టాన్ని ఎదుర్కొంటున్న రాష్ట్రాలకు పరిహారం కింద ఇవ్వాల్సిన రూ.34,000 కోట్లు పూర్తిస్థాయిలో అందించింది.
ఈ ఏడాది ఫిబ్రవరి 27న తొలి దఫాలో రూ.19,950 కోట్లు విడుదల చేసిన కేంద్రం.. తాజాగా ఈనెల 7 మంగళవారం మిగతా రూ.14,103 కోట్లు అందించింది. దీంతో గత అక్టోబర్, నవంబర్ నెలలకు సంబంధించిన బకాయిలు మొత్తం విడుదల చేసినట్లయింది.
డిసెంబర్, జనవరి బకాయిలు త్వరలోనే..
గత ఏడాది డిసెంబర్, ఈఏడాది జనవరికి సంబంధించిన పరిహారాన్ని త్వరలోనే విడుదల చేసేందుకు ప్రణాళిక రచిస్తోంది కేంద్ర ఆర్థిక శాఖ.
జీఎస్టీ చట్టం నియమాల ప్రకారం.. జీఎస్టీ అమలులోకి వచ్చిన 2017 జులై 1 నుంచి ఐదేళ్ల పాటు రాష్ట్రాల పన్ను ఆదాయం 2015-16 ఆర్థిక సంవతర్సాన్ని ఆధారంగా చేసుకుని 14 శాతం పెరగకుండా ఆ నష్టాన్ని కేంద్రం భరిస్తుంది. ఇప్పటి వరకు రూ.2.45 లక్షల కోట్లు పరిహారం కింద రాష్ట్రాలకు విడుదల చేసింది కేంద్రం.
