ఆదాయ పన్ను రిటర్నులకు సంబంధించి నూతన ఐటీఆర్ ఫారాలను విడుదల చేసింది ఆదాయ పన్ను శాఖ. 2018-19తోపాటు ప్రస్తుత ఆర్థిక సంవత్సరానికీ వీటినే ఉపయోగించాలని స్పష్టం చేసింది.
ఐటీఆర్ 1( సహజ్)లో స్వల్ప మార్పులు చేసింది కేంద్ర ప్రత్యక్ష పన్నుల బోర్డు (సీబీడీటీ). ఇతర ముఖ్యమైన వివరాలు చూద్దాం.
ఐటీఆర్ 1 ఎవరు వాడాలి?
ఇది భారత్లో నివసిస్తున్న వారికే. వేతనాలు, ఇంటి అద్దె, ఇతర ఆదాయ మార్గాల(వడ్డీలు) నుంచి రూ.50 లక్షల లోపు ఆదాయం వచ్చే వారు దీనిని దాఖలు చేయాల్సి ఉంటుంది.
స్టాండర్డ్ డిడక్షన్(ప్రామాణిక కోత)
ఈ ఏడాది ఐటీఆర్1లో స్టాండర్డ్ డిడక్షన్ చేసేందుకు ప్రత్యేక కాలమ్ను పొందుపరిచింది ఆదాయపన్ను శాఖ. స్టాండర్డ్ డిడక్షన్ అంటే వేతనంలోంచి వైద్యం, రవాణా ఖర్చుల నిమిత్తం తీసేసే మొత్తం. దీనిపై ఎలాంటి పన్ను కట్టాల్సిన అవసరంలేదు.
గతంలో ఇది 34,200గా ఉండేది. 2018-19 ఆర్థిక సంవత్సరానికి స్టాండర్డ్ డిడక్షన్(ప్రామాణిక కోత)కు రూ.40,000 పరిమితి విధించింది కేంద్రం. వచ్చే ఆర్థిక సంవత్సరానికి దీన్ని రూ.50,000కు పెంచింది.
ఇతర మార్గాల నుంచి వచ్చే ఆదాయం వివరాలు
ఇప్పటి వరకూ ఇతర మార్గాల నుంచి వచ్చే ఆదాయం ఎంత అని రిటర్నులో పేర్కొంటే సరిపోయేది. తాజా మార్పుల్లో ఆ ఆదాయం ఎలా వస్తుందనే పూర్తి వివరాలు సమర్పించాల్సి ఉంటుంది.
ఇతర మార్గాల నుంచి ఆదాయం అంటే... వడ్డీలు, పోస్టాఫీస్ పొదుపు పథకం, బ్యాంకు ఫిక్సిడ్ డిపాజిట్లు ఇలా ఏ ఆదాయ మార్గమైనా వాటి వివరాలు తెలపాల్సి ఉంటుంది.
ఐటీఆర్1 ఎవరు వాడకూడదు?
భారతీయులై ఉండి... ఏదైనా కంపెనీలో డైరెక్టర్ స్థాయిలో ఉన్నా... అన్లిస్టెడ్ కంపెనీల్లో వాటాలు ఉన్నా వారు ఐటీఆర్ 1ను వాడకూడదు.
రెండు ఇళ్లు ఉన్నాయా?
మీకు రెండో ఇల్లు ఉంటే అది ఎక్కడ ఉంది వాటి పూర్తి వివరాలు చెప్పాల్సి ఉంటుంది. అందులో మీరే ఉంటున్నారా... వేరే ఎవరైనా ఉంటున్నారా అనే వివరాలు వెల్లడించాల్సి ఉంటుంది.
2018-19 ఆర్థిక సంవత్సరంలో మీరు ఎక్కడ ఉన్నారు
ఈ ఏడాది మీరు ఐటీఆర్ 2ను సమర్పించినట్లయితే... తప్పనిసరిగా 2018-19 ఆర్థిక సంవత్సరంలో మీరు ఎక్కడున్నారనే విషయాన్ని చెప్పాలి. విదేశాల్లో ఉంటున్న భారతీయులైతే గతేడాది ఎన్నిరోజులు భారత్లో ఉన్నారనే వివరాలు చెప్పాల్సి ఉంటుంది.
ఇవీ చూడండి: 'పన్ను బాదకుంటే అలాంటి పథకాలు వీలుకావు'
