సెయిల్ ఛైర్మన్ అనిల్ కుమార్ చౌదరికి కరోనా సోకినట్లు తెలుస్తోంది. దీంతో సెయిల్ కార్పొరేట్ కార్యాలయంలో కరోనా బారిన పడిన వారి సంఖ్య 25కి చేరిందని విశ్వసనీయ వర్గాలు పేర్కొన్నాయి. 'అనిల్ కుమార్ చౌదరికి జూన్‌ 1 నుంచి వరుసగా మూడు రోజులు పరీక్షలు నిర్వహించగా.. కొవిడ్-19 పాజిటివ్‌ అని తేలింది. ఇప్పుడు ఆయన క్వారంటైన్‌లో ఉన్నార'ని తెలిపాయి.
డైరెక్టర్ మృతిపై..
సెయిల్ డైరెక్టర్ (పర్సనల్‌) అతుల్‌ శ్రీవాస్తవ బుధవారం అపోలో ఆసుపత్రిలో మరణించారు. గత కొన్ని రోజులుగా తీవ్రమైన జ్వరంతో బాధపడుతుండటంతో పాటు శ్వాస తీసుకోవడంలో ఇబ్బందిగా ఉందని చెప్పడంతో శ్రీవాస్తవను అపోలో ఆసుపత్రిలో చేర్పించామని సెయిల్ వెల్లడించింది. ఆయనకు కొవిడ్-19 పరీక్ష నిర్వహించగా నెగిటివ్‌ వచ్చిందని తెలిపింది. అయితే.. ఆయన మరణానికి గల కారణాలపై సామాజిక మాధ్యమాల్లో తప్పుడు సమాచారంతో ఓ లేఖ సర్క్యులేట్‌ అవుతోందని, అందులో పేర్కొన్న వివరాలు నిరాధారమైనవని సెయిల్ స్పష్టం చేసింది. అతుల్‌ శ్రీవాస్తవ కుటుంబీకుల్లో మనోధైర్యం నింపేందుకు ప్రయత్నిస్తున్న ఈ తరుణంలో ఇలాంటివి ప్రచారం కావడం దురదృష్టకరమని పేర్కొంది. అతుల్‌ శ్రీవాస్తవ మరణానికి గల కారణాలను కప్పిపుచ్చుకునేందుకు సెయిల్ ప్రయత్నిస్తోందని ఆ లేఖలో ఉండటంతో సెయిల్ స్పష్టత ఇచ్చింది.
ఇదీ చూడండి: భగవద్గీతతో ప్రశాంతత: గబార్డ్‌
