ఆర్థిక మందగమనం కారణంగా ప్రస్తుత ఆర్థిక సంవత్సరం మూడో త్రైమాసికంలో గృహ విక్రయాలు భారీగా క్షీణించినట్లు తెలుస్తోంది. రియల్టీ కన్సల్టేషన్ సంస్థ 'ప్రాప్ టైగర్' విడుదల చేసిన నివేదిక ప్రకారం.. దేశంలోని 9 ప్రధాన నగరాల్లో ప్రస్తుత ఆర్థిక సంవత్సరం మూడో త్రైమాసికంలో ఇళ్ల విక్రయాలు 30 శాతం క్షీణించాయి. ఈ సమయంలో 64,034 యూనిట్లు మాత్రమే విక్రయమయ్యాయి. అంతకు ముందు ఆర్థిక సంవత్సరం (2018-19) ఇదే సమయంలో 91,464 యూనిట్లు అమ్ముడవడం గమనార్హం.
గడిచిన మూడు త్రైమాసికాల్లోనూ అదే తీరు..
2019-20 తొలి తొమ్మిది నెలల్లో చూస్తే... రెసిడెన్షియల్ ప్రాపర్టీ మార్కెట్ 13 శాతం తగ్గినట్లు తేలింది.
హైదరాబాద్, బెంగళూరు, చెన్నై, గురుగ్రామ్, కోల్కతా, ముంబయి, పుణె, నోయిడా, అహ్మదాబాద్లలో చేసిన సర్వే ఆధారంగా ఈ నివేదిక విడుదల చేసింది 'ప్రాప్ టైగర్'.
నగరాల వారీగా..
నగరాల వారీగా చూస్తే డిసెంబర్తో ముగిసిన త్రైమాసికానికి బెంగళూరులో అత్యధికంగా 50 శాతం వరకు ఇళ్ల విక్రయాలు తగ్గాయి. మొత్తం 5,155 యూనిట్లు మాత్రమే విక్రయమయ్యాయి.
| నగరం | క్యూ3లో తగ్గుదల శాతం | క్యూ3లో అమ్ముడైన యూనిట్లు |
| హైదరాబాద్ | 44 | 4,372 |
| పుణె | 39 | 11,946 |
| నోయిడా | 38 | 2,830 |
| చెన్నై | 33 | 3,015 |
| కోల్కతా | 33 | 2,566 |
| ముంబయి | 18 | 25,198 |
| అహ్మదాబాద్ | 14 | 5,118 |
| గురుగ్రామ్ | 6 | 3,834 |
ఇదీ చూడండి:రెండు దశాబ్దాల తర్వాత మళ్లీ మార్కెట్లోకి బజాజ్ చేతక్
