ఆటోమొబైల్ దిగ్గజం 'నిస్సాన్' మాజీ అధినేత కార్లోస్ ఘోసన్కు టోక్యో కోర్టు మంగళవారం బెయిల్ మంజూరు చేసింది. సంస్థలో ఆర్థికపరమైన అవకతవకలకు పాల్పడినట్లు ఘోసన్పై ఆరోపణలున్నాయి.
ఆయన్ను 2018 నవంబర్ 19న జపాన్ పోలీసులు అరెస్టు చేశారు. దాదాపు మూడు నెలలు జైల్లో గడిపిన తర్వాత అనూహ్య రీతిలో ఘోసన్కు బెయిల్ మంజూరైంది. 9 మిలియన్ డాలర్ల పూచీకత్తుతో టోక్యోకోర్టు బెయిల్ మంజూరు చేసింది. ఇప్పటికే రెండు సార్లు బెయిల్ దరఖాస్తులను తోసిపుచ్చిన కోర్టు మూడో సారి సానుకూలంగా స్పందించింది.
నిన్న ఘోసన్ తరపున వాదించిన కొత్త న్యాయవాది జునీచిరో హిరోనకా మీడియాతో మాట్లాడుతూ... ఈసారి బెయిల్ కోసం కొత్త కారణాలు జోడించినట్లు పేర్కొన్నారు. జపాన్లో ఉన్నత స్థాయిలో ఉన్నవారందరి కేసులు వాదించే న్యాయవాదిగా హిరోనకాకు పేరుంది.
విదేశాలకు వెళ్లొద్దు
ఇతర దేశాలకు పారిపోయే అవకాశం, సాక్ష్యాలను తారుమారు చేసేందుకు అవకాశం ఉందని కోర్టు ఇంతకు ముందు తీర్పులో పేర్కొంది. ఆరోపణల నేపథ్యంలో ఘోసన్ జపాన్ విడిచి వెళ్లేందుకు వీల్లేదని షరతులు విధించింది టోక్యో కోర్టు.
నేనెందుకు సిగ్గుపడాలి: ఘోసన్
చాలా కాలం తర్వాత విదేశీ మీడియాతో మాట్లాడిన ఘోసన్ నిర్భందం పొడగింపు ఏ దేశంలోనైనా సాధారణమైన విషయమన్నారు. అలాంటప్పుడు "నాకు శిక్ష పడకముందే నేనెందుకు సిగ్గు పడాలి" అని ఘోసన్ అన్నారు.
ఆరోపణలు ఇవే
నిస్సాన్, మిస్తుబుషి, రెనో సంస్థల నుంచి ఘోసన్పై ఆరోపణలున్నాయి. వాటిలో రెండు ఆయన వేతనాలకు సంబంధించినవి. మూడోది ఆయన వ్యక్తిగత నష్టాలను నిస్సాన్కు బదిలీ చేశారనే ఆరోపణ.
జపనీస్ చట్ట ప్రకారం
జపనీస్ చట్టాల ప్రకారం నిందితులు 22 రోజులు విచారణ ఎదుర్కోవాల్సి ఉంటుంది. నిందుతుడిపై తాజాగా మరో ఆరోపణ వస్తే అప్పుడు నెలరోజుల పాటు కస్టడీని పొడగించవచ్చు. అలా పొడిగింపు కారణంగా ఘోసన్ మూడు నెలల పాటు జైల్లో ఉండాల్సొచ్చింది.
జపాన్లో ఈ విధమైన పాతకాలపు చట్టాలపై ఐక్యరాజ్య సమితి మానవ హక్కుల మండలికి వెళ్తామని ఘోసన్ భార్య కరోలీ ప్రకటించారు.
నిరాకరించిన నిస్సాన్
ఘోసన్కు కోర్టు బెయిల్ మంజూరు చేయటంపై నిస్సాన్ సంస్థ స్పందించేందుకు నిరాకరించింది.
