భారత టెక్ నిపుణులు సీఈఓలుగా వ్యవహరిస్తున్న కంపెనీల జాబితాలో తాజాగా ఐబీఎం వచ్చి చేరింది. ఆసక్తికర విషయం ఏమిటంటే... యూఎస్‌లో అధిక మార్కెట్ విలువ (మార్కెట్ క్యాపిటలైజేషన్‌) గల కంపెనీలకు భారత నిపుణులే సారథ్యం వహించటం.
తొలుత సత్య నాదెళ్ల మైక్రోసాఫ్ట్ సీఈఓగా ఎంపికైనప్పుడు.. ప్రపంచ వ్యాప్తంగా పెద్ద సంచలనం అయింది. అమెరికన్ సంస్థకు భారతీయుడు సారథ్యం వహించటం ఏమిటని వ్యాఖ్యానించారు. తదుపరి గూగుల్ సీఈఓగా సుందర్‌ పిఛాయ్‌ నియమితులు కావటం, అడోబ్కు శంతను నారాయణ్‌ నాయకత్వం వహించటం వంటి పరిణామాలతో ప్రపంచ దేశాలు మన నాయకత్వ పటిమను గుర్తించినట్లు అయ్యింది.
ఇప్పుడు తాజాగా ఐబీఎంకు భారతీయుడైన అర్వింద్ కృష్ణ సీఈఓ అయ్యారు. కంప్యూటర్‌ హార్డ్‌వేర్‌, సర్వీసెస్‌ విభాగంలో ఐబీఎం పేరు తెలియని వారు ఉండరంటే అతిశయోక్తి కాదు. ఇటువంటి ప్రతిష్ఠాత్మక కంపెనీకి సీఈఓగా భారతీయుడు ఎంపిక కావటం... మన సత్తా మరింతగా విస్తరించినట్లు అయిందని స్థానిక ఐటీ వర్గాలు విశ్లేషిస్తున్నాయి.
ఈ కంపెనీల మార్కెట్ విలువ కూడా ఎంతో అధికంగా ఉంది. ఎంత అంటే...? మనదేశంలో స్టాక్‌మార్కెట్ల మొత్తం విలువ కంటే కూడా ఎక్కువ! 2018లో మన స్టాక్‌మార్కెట్లు నమోదు చేసిన గరిష్ఠ మార్కెట్ విలువ 2.45 ట్రిలియన్‌ డాలర్లు. కానీ ఈ నాలుగు కంపెనీలు...మైక్రోసాఫ్ట్, గూగుల్, అడోబ్, ఐబీఎం- మార్కెట్ విలువ దీనికంటే అధికంగా 2.6 ట్రిలియన్‌ డాలర్లు ఉండటం ప్రత్యేకత.
మన భారతీయులు అత్యుత్తుమ నిర్వహణ నైపుణ్యాల వల్లే దిగ్గజ సంస్థల్లో అగ్రగాములుగా రాణిస్తున్నారు. ఇకపై టెక్నాలజీ సంస్థల నిర్వాహకులతో వైట్‌హౌస్‌ నిర్వహించే సమావేశాల్లో హ్యామ్‌బర్గర్స్‌ స్థానంలో సమోసాలు పెట్టాల్సి రావచ్చు’
- ఆనంద్‌ మహీంద్రా సరదా ట్వీట్‌
ఇదీ చూడండి: సవాళ్ల పథంలో బడ్జెట్ రథం.. స్వప్నం సాకారమయ్యేనా?
