రష్యాకు చెందిన స్పుత్నిక్-వి టీకా ఉత్పత్తిని సీరం ఇనిస్టిట్యూట్ ఆఫ్ ఇండియా (ఎస్‌ఐఐ) సెప్టెంబరులో ప్రారంభించనుంది. ఈ సంస్థలో వ్యాక్సిన్ తయారీకి కావాల్సిన మెరుగైన సౌకర్యాలు ఉన్నాయని రష్యా డైరెక్ట్ ఇన్వెస్ట్‌మెంట్ ఫండ్ (ఆర్డీఐఎఫ్) మంగళవారం తెలిపింది. భారత్లో ఏడాదికి 300 మిలియన్ డోసులు ఉత్పత్తి చేసేలా ప్రణాళికలు రూపొందిస్తున్నట్లు వెల్లడించింది.
టీకా సాంకేతిక బదిలీ ప్రక్రియలో భాగంగా.. ఇప్పటికే గమలేయ ఇన్స్టిట్యూట్ నుంచి సెల్, వెక్టార్ నమూనాలను అందుకుంది సీరం సంస్థ. వీటి దిగుమతిని డ్రగ్ కంట్రోలర్ జనరల్ ఆఫ్ ఇండియా (డీసీజీఐ) ఆమోదించింది. దీనితో ఉత్పత్తి ప్రక్రియ ప్రారంభమైనట్లు ఆర్డీఐఎఫ్ ఓ ప్రకటనలో తెలిపింది. ఈ నెల మొదటి వారంలో భారత్లో స్పుత్నిక్-వి టీకా ఉత్పత్తి కోసం సీరమ్ సంస్థకు డీసీజీఐ అనుమతులు లభించాయి.
వేరియంట్ ఏదైనా..
కరోనా వైరస్‌ను ఎదుర్కొనే వ్యాక్సిన్‌లు ప్రపంచవ్యాప్తంగా అందుబాటులోకి వచ్చినప్పటికీ.. కొత్తగా వెలుగు చూస్తోన్న వేరియంట్లు మాత్రం టీకాల పనితీరుకు ఓ సవాలుగా మారుతున్నాయి. ఇప్పటికే వినియోగిస్తోన్న టీకాలు కొన్ని వేరియంట్లను ఎదుర్కోగలుగుతున్నట్లు నివేదికలు వస్తున్నాయి. తాజాగా రష్యా అభివృద్ధి చేసిన స్పుత్నిక్-వి వ్యాక్సిన్ కూడా కొత్తగా బయటపడుతోన్న వేరియంట్లను తటస్థీకరించడంలో సమర్థవంతంగా పనిచేస్తున్నట్లు తాజాగా ఓ అధ్యయనం వెల్లడించింది.
ప్రపంచవ్యాప్తంగా ప్రస్తుతం అందుబాటులో ఉన్న వ్యాక్సిన్‌లు తొలుత వుహాన్‌లో వెలుగుచూసిన వైరస్ స్ట్రెయిన్‌ ఆధారంగా రూపొందించారు. కానీ, రోజురోజుకు రూపాంతరం చెందుతోన్న వైరస్, ప్రమాదకర వేరియంట్లుగా మారుతోంది. ఈ నేపథ్యంలో ఆల్ఫా, బీటా, గామాతో పాటు అత్యంత ప్రమాదకరమైందిగా భావిస్తోన్న డెల్టా వేరియంట్‌ను తటస్థీకరించడంలో స్పుత్నిక్-వి మెరుగైన పనితీరు కనబరుస్తున్నట్లు వ్యాక్సిన్ తయారీ సంస్థ ఆర్డీఐఎఫ్ వెల్లడించింది. ఇందుకోసం స్పుత్నిక్ టీకా తీసుకున్నవారి రక్త నమూనాలను సేకరించి పరిశీలించినట్లు తెలిపింది.
ఇదీ చదవండి : స్పుత్నిక్-వి ఉత్పత్తి కోసం సీరం దరఖాస్తు!
