స్టాక్ మార్కెట్ల వరుస నష్టాలకు నేడు బ్రేక్ పడింది. బేర్పై బుల్ తిరగబడి నేడు భారీ లాభాలను నమోదు చేసింది.
బొంబాయి స్టాక్ ఎక్స్చేంజి సూచీ-సెన్సెక్స్ 1,628 పాయింట్లు బలపడింది. 29,916 వద్దకు చేరింది. ఇంట్రాడేలో ఈ సూచీ 30,418 పాయింట్ల గరిష్ఠాన్ని తాకగా.. 27,932 పాయింట్ల కనిష్ఠాన్ని నమోదు చేసింది.
జాతీయ స్టాక్ ఎక్స్చేంజి సూచీ-నిఫ్టీ 482 పాయింట్ల వృద్ధితో 8,745 కి చేరింది.
కారణాలు ఇవే..
- కరోనా కారణంగా ప్రపంచ ఆర్థిక వ్యవస్థలు కుదేలైన వేళ ఆయా దేశాలు సంస్కరణలు మొదలు పెట్టాయి. ఆర్థిక వ్యవస్థలను గాడినపెట్టేందుకు భారీ ఉద్దీపనలకు సిద్ధమయ్యాయి.
- భారత్లోను ఆర్థిక వ్యవస్థకు ఊతమందించే చర్యలుంటాయని ప్రధాని నరేంద్ర మోదీ ఇటీవల ప్రకటించారు. ఫలితంగా మదుపరులు కొత్త ఉత్సాహంతో కొనుగోళ్లపై దృష్టి సారించారు.
- గత సెషన్లో అమెరికా మార్కెట్లు భారీగా లాభపడటమూ మన సూచీలపై సానుకూల ప్రభావం చూపింది.
- హెవీ వెయిట్ షేర్లన్నీ సానుకూలంగా స్పందించడం కూడా నేటి లాభాలకు కారణంగా చెబుతున్నారు నిపుణులు.
లాభనష్టాల్లోనివి ఇవే..
ఓఎన్జీసీ, అల్ట్రాటెక్ సిమెంట్, హెచ్యూఎల్, రిలయన్స్, టీసీఎస్, టాటా స్టీల్ షేర్లు భారీగా లాభాలను నమోదు చేశాయి.
హెచ్డీఎఫ్సీ బ్యాంక్, ఇండస్ఇండ్ బ్యాంక్లు, యాక్సిస్ బ్యాంక్ స్వల్ప నష్టాలను మూటగట్టుకున్నాయి.
ఇదీ చూడండి:అంబానీల నిర్ణయంతో రిలయన్స్ షేర్ల దూకుడు
