2020 ద్వితీయార్థంలో.. వినియోగదారుల సమాచారం(యూజర్ డేటా) తెలపాల్సిందిగా భారత ప్రభుత్వం నుంచి 40,300 అభ్యర్థనలను అందుకున్నట్లు సామాజిక మాధ్యమ దిగ్గజం ఫేస్బుక్ తన పారదర్శకత నివేదికలో వెల్లడించింది. ఐటీ చట్టం-2000 సెక్షన్ 69ఏ ఉల్లంఘణ కింద.. 878 పోస్టులను తొలగించినట్లు పేర్కొన్న ఎఫ్బీ.. జాతీయ భద్రత దృష్ట్యా.. సమాచార సాంకేతిక మంత్రిత్వ శాఖ ఆదేశాల మేరకు ఈ చర్యను చేపట్టినట్లు వివరించింది.
నివేదికలోని అంశాలు..
- 2020 ద్వితీయార్థంలో వచ్చిన అభ్యర్థనలు 40,300.. వీటిలో 37,865 చట్టపరమైన ప్రక్రియకు సంబంధించినవి కాగా.. 2,435 అత్యవసర అభ్యర్థనలు.
- జనవరి-జూన్ మధ్యకాలంలో వచ్చిన అభ్యర్థనలు(35,560) కన్నా ఇది 13.3శాతం ఎక్కువ.
- జూలై-డిసెంబర్ కాలంలో వచ్చిన అత్యధిక అభ్యర్ధనలు చేసిన దేశం అమెరికా( 61,262) తర్వాత.. భారత్ రెండో స్థానంలో ఉంది.
- ప్రపంచవ్యాప్తంగా పలు దేశాల ప్రభుత్వాల నుంచి వచ్చిన అభ్యర్థనలు 10శాతం (191,013) మేర పెరిగాయి.
- భారత ప్రభుత్వం నుంచి 62,754 అకౌంట్లకు సంబంధించి అభ్యర్థనలు రాగా.. 52శాతం యూజర్ల డేటాను ఎఫ్బీ అందించింది.
"ప్రభుత్వాల నుంచి వచ్చే అభ్యర్థనలకు సంబంధిత చట్టాలు, సర్వీసు నిబంధనలకు అనుగుణంగానే ఫేస్బుక్ స్పందిస్తుంది. మేము స్వీకరించే ప్రతి అభ్యర్థన చట్టపరమైనదా? కాదా? అని సమీక్షిస్తాం. ఒక పోస్టుకు సంబంధించి అత్యధికంగా, అస్పష్టంగా వచ్చే అభ్యర్థనలు ఎక్కువగా తిరస్కరణకు గురవుతాయి. అలాగే.. ఆయా దేశాల్లోని చట్టాలను ఫేస్బుక్ గౌరవిస్తుంది. అయితే.. నిబంధనలకు విరుద్ధంగా ప్రభుత్వాల నుంచి వచ్చే డిమాండ్లను గట్టిగా వ్యతిరేకిస్తుంది."
-పారదర్శక నివేదికలో ఫేస్బుక్
ఇవీ చదవండి: మోదీ వ్యతిరేక పోస్ట్లను బ్లాక్ చేసిన ఫేస్బుక్!
