ప్రపంచంలోనే అత్యంత శక్తిమంతమైన అమెరికా ఫెడరల్ రిజర్వు, యూరోపియన్ సెంట్రల్ బ్యాంకులను అధిగమించి భారతీయ రిజర్వు బ్యాంకు(ఆర్బీఐ) సరికొత్త రికార్డును సొంతం చేసుకుంది. ఆర్బీఐ ట్విట్టర్ ఖాతా అత్యధికంగా 10లక్షల మంది ఫాలోవర్స్ను సంపాదించి ఈ ఘనత సాధించింది. ప్రపంచంలోనే అత్యధిక మంది అనుసరిస్తున్న సెంట్రల్ బ్యాంక్ ట్విట్టర్ హాండిల్గా నిలిచింది ఆర్బీఐ.
"ఆర్బీఐ ట్విట్టర్ ఖాతా 10లక్షల ఫాలోవర్స్ను సంపాదించింది. ఇది సరికొత్త ఘనత. సంస్థ అధికారులు, సిబ్బందికి శుభాకాంక్షలు."
--శక్తికాంత దాస్, ఆర్బీఐ గవర్నర్.
ఆర్బీఐ 2012లో ట్విట్టర్ ఖాతాను ప్రారంభించింది. 2019, మార్చి వరకు 3లక్షల 42వేల మంది అనుసరించగా.. 2020 మార్చి నాటికి ఆ సంఖ్య రెట్టింపు అయ్యింది. లాక్డౌన్ కాలంలో మరో లక్షన్నర మంది ఫాలోవర్స్ పెరిగారని అధికారులు తెలిపారు. ప్రస్తుత ఆర్థిక సంవత్సరంలో కొత్తగా 2లక్షల 50వేల మంది ఆర్బీఐ ఖాతాను ఫాలో అవుతున్నారన్నారు. దీంతోపాటు 'ఆర్బీఐ సేస్' అనే పేరుతో మరో ట్విట్టర్ ఖాతాను నిర్వహిస్తోంది రిజర్వు బ్యాంకు.
ప్రపంచంలోనే అత్యంత శక్తిమంతమైన అమెరికా ఫెడరల్ రిజర్వ్ బ్యాంక్కు ప్రస్తుతం 6లక్షల 67వేల మంది ఫాలోవర్స్ ఉన్నారు. యూరోపియన్ సెంట్రల్ బ్యాంక్ను 5లక్షల 91వేల మంది అనుసరిస్తున్నారు.
