స్టాక్ మార్కెట్లకు ఈ వారం స్థూల ఆర్థిక గణాంకాలు, కరోనా వ్యాక్సినేషన్ వార్తలు, కార్పొరేట్ల మూడో త్రైమాసిక ఫలితాలు కీలకంగా మారనున్నాయని విశ్లేషకులు చెబుతున్నారు.
ఐటీ దిగ్గజం టీసీఎస్తో క్యూ3 ఫలితాల సీజన్ ప్రారంభం కానుంది. ఈ నెల 8న టీసీఎస్ 2020-21 క్యూ3 ఫలితాలు ప్రకటించనుంది. ఈ వారమే తయారీ, సేవా రంగ పీఎంఐ గణాంకాలూ విడుదల కానున్నాయి. ఈ అంశాలన్నీ మార్కెట్లను ముందుకు నడిపించనున్నాయని నిపుణులు చెబుతున్నారు. అయితే సూచీలు గత వారం రికార్డు స్థాయిల వద్ద ముగిసిన నేపథ్యంలో మదుపరులు కొంత లాభాల స్వీకరణకు మొగ్గు చూపే అవకాశముందని అంచనా వేస్తున్నారు.
'కరోనా వ్యాక్సిన్కు అనుమతులు, అమెరికా ఉద్దీపన ప్యాకేజీ వార్తలు గత వారం వరకు మార్కెట్ల భారీ లాభాలకు దన్నుగా నిలిచాయి. అయితే కంపెనీల క్యూ3 ఫలితాల సీజన్, కేంద్ర బడ్జెట్ వార్తలూ ఇకముందు మార్కెట్లకు కీలకంగా మారనున్నాయి' అని మోతీలాల్ ఓస్వాల్ ఫినాన్సియల్ సర్వీసెస్ లిమిటెడ్ పరిశోధన విభాగాధిపతి సిద్ధార్థ్ ఖింకా పేర్కొన్నారు.
