కరోనా లాక్డౌన్ దెబ్బకు దేశవ్యాప్తంగా పరిశ్రమలన్నీ మూతబడ్డాయి. పలు రంగాలు ఆర్థికంగా కుదేలైపోయాయి. ఎటువంటి కార్యకలాపాలు జరగకపోవడం వల్ల సంస్థలు జీతాలు చెల్లించలేమని చేతులెత్తేస్తున్నాయి. ఇప్పటికే చాలా మంది ఉద్యోగాలు కోల్పోయి రోడ్డున పడ్డారు. ఇక చిన్నపాటి పరిశ్రమలైతే అప్పుల వడ్డీలు తీర్చలేక మూసేస్తామంటున్నారు. మరి ఇలాంటి నేపథ్యంలో సామాన్యుడిని ఆదుకునేదెలా? సంస్థలకు ఆపన్నహస్తం అందించి దేశాన్ని నడిపించేదెలా? వస్తూత్పత్తిని పెంచేందుకు ముందున్న లక్ష్యాలేంటి? అనే అంశాలను పరిశీలించిన భారత ప్రభుత్వం.. ఉద్దీపన చర్యలు ప్రారంభించింది.
దేశానికి వెన్నెముకలా ఉన్న పరిశ్రమలకు చేయూతనిస్తే ఆర్థిక చక్రం పరుగెడుతుందని భావించిన కేంద్రం.. ఆ దిశగా నేడు కీలక ప్రకటనలు చేసింది. మరి వీటి వల్ల సామాన్యుడికి కలిగే ప్రయోజనాలు ఏంటి? ఓ సారి పరిశీలిద్దాం.
12 నెలల మారటోరియంతో రుణాలు...
చిన్న వ్యాపారాలు, ఎంఎస్ఎంఈలకు సంబంధించి రూ. 3 లక్షల కోట్లు కేటాయించారు. పూచీకత్తు లేకుండా, 12 నెలల మారటోరియంతో రుణాలు ఇవ్వనున్నారు. అంటే ఏడాది పాటు రుణాలపై ఎలాంటి తిరిగి చెల్లింపులు చేయక్కరలేదు. ఎంఎస్‌ఎంఈలు తక్షణం ఉత్పత్తి ప్రారంభించేందుకు, వాటిల్లోని ఉద్యోగులకు భద్రత కల్పించేందుకు ఉపయోగపడనుంది. సంస్థలు కూడా అప్పుల ఊబిలో పడి మూతపడకుండా ఈ సాయం ఆసరాగా నిలవనుంది.
పెట్టుబడులు కోసం రూ.50 వేల కోట్లు...
ఎంఎస్‌ఎంఈల్లో ఈక్విటీ పెట్టుబడుల కోసం రూ.50వేల కోట్లు కేటాయించారు. ఉత్పత్తి సామర్థ్యాల పెంపు కోసం రూ.10 వేల కోట్లతో ఫండ్‌ ఆఫ్ ఫండ్స్ ఏర్పాటు చేయనున్నారు. శక్తి, సామర్థ్యం ఉన్న ఏ ఎంఎస్‌ఎంఈ అయినా అయినా ఈ సదుపాయం ఉపయోగించుకోవచ్చు. ఎన్‌పీఏ ముప్పు ఎదుర్కొంటున్న సంస్థలకు ఇది లాభదాయకం.
పెట్టుబడులు పెరిగినా అదే పరిధిలో...
సూక్ష్మ, చిన్న, మధ్య తరహా పరిశ్రమల్లో పెట్టుబడి పరిమితిని గణనీయంగా పెంచారు. పెద్దమొత్తంలో పెట్టుబడులు వచ్చినా ఎంఎస్‌ఎంఈ పరిధిలోనే ఉంటారు. ప్రభుత్వ కొనుగోళ్లలో రూ.200 కోట్ల విలువ వరకు దేశీయంగానే సేకరణ ఉంటుంది. గ్లోబల్‌ టెండర్లకు అవకాశం లేదు.
కాంట్రాక్టర్లకు లాభమిదే...
నిర్మాణ, సేవల కాంట్రాక్టులకు ఆరు నెలల వరకు వెసులుబాటు ఇస్తున్నారు. కేంద్రప్రభుత్వ ఏజెన్సీల కాంట్రాక్టు పనుల పూర్తి చేసేందుకు ఈ అదనపు సమయం ఇవ్వనున్నారు. కేంద్ర ప్రభుత్వ ఏజెన్సీలు కాంట్రాక్టర్ల బ్యాంకు గ్యారంటీలను పాక్షికంగా విడుదల చేసేందుకు అవకాశం లభిస్తుంది. ఈ వెసులుబాటు వల్ల కాంట్రాక్టర్లకు నిధుల లభ్యత కొరత కొంతవరకు తగ్గుతుంది.
చిన్న సంస్థలు, ఉద్యోగులకు సాయం..
ఈపీఎఫ్ పరిధిలోకి వచ్చే ఎంఎస్ఎంఈలకు మూడు నెలల భవిష్య నిధి(పీఎఫ్) ప్రభుత్వమే చెల్లిస్తుంది. జూన్, జులై, ఆగస్టు నెలల పీఎఫ్ మొత్తం రూ.2500 కోట్లు కేంద్రం ఇవ్వనుంది.
ఉద్యోగులు, యాజమాన్యాల ఈపీఎఫ్ కాంట్రిబ్యూషన్ 12 నుంచి 10 శాతానికి తగ్గించారు. ఫలితంగా మూడు నెలల వరకు ఇది వర్తిస్తుండగా.. అందుకు రూ.6750 కోట్లు కేటాయించారు.
ప్రత్యక్ష పన్ను చెల్లింపుదారులకు ఊరట...
ప్రస్తుతం ఉన్న టీడీఎస్, టీసీఎస్‌ రేట్లు 25 శాతం తగ్గించనున్నారు. మే 14 నుంచి నుంచి 2021మార్చి 31 వరకు టీడీఎస్, టీసీఎస్‌ రేటు తగ్గింపు అమల్లో ఉంటుంది. ఈ వెసులుబాటు వల్ల ప్రజలకు సుమారు ₹50 వేల కోట్లు ప్రయోజనం కలుగుతుంది.
