భారత్లో తన అతిపెద్ద ( ఫుల్ఫిల్మెంట్) సరుకు రవాణా కేంద్రాన్ని విస్తరించడం కోసం జీఎంఆర్ హైదరాబాద్ ఎయిర్పోర్టు సిటీతో భారీ ఒప్పందం కుదుర్చుకున్నట్లు ఈ-కామర్స్ దిగ్గజం అమెజాన్.ఇన్ పేర్కొంది.
ప్రస్తుతం ఉన్న గిడ్డంగి 4 లక్షల చదరపు అడుగుల విస్తీర్ణంలో ఉంది. దీన్ని మరో 1.8 లక్షల చదరపు అడుగులకు విస్తరించనున్నట్లు అమెజాన్.ఇన్ తెలిపింది.
"ఈ పెట్టుబడితో, అమెజాన్.ఇన్.... రాష్ట్రంలో మూడుకి మించి సరుకు రవాణా కేంద్రాలను కలిగి ఉంది. మొత్తం ప్రాసెసింగ్ ప్రాంతము 8.5 లక్షల చదరపు అడుగులకు పైగా ఉంది."
- అమెజాన్. ఇన్
అయితే ఈ దిగ్గజ ఈ-కామర్స్ సంస్థ తన మొత్తం పెట్టుబడి పరిమాణాన్ని మాత్రం వెల్లడించకపోవడం గమనార్హం.
పోటీని తట్టుకునేందుకే...
ప్రస్తుతం భారత విపణిలో ఫ్లిప్కార్ట్తో గట్టి పోటీని ఎదుర్కొంటోంది అమెజాన్.ఇన్. అయితే ప్రస్తుతం జీఎంఆర్తో చేసుకున్న ఒప్పందం వల్ల పండుగ సీజన్లో... అమెజాన్.ఇన్ తన వినియోగదారులకు వేగవంతమైన సేవలు అందించడానికి వీలవుతుంది.
సంప్రదాయ గిడ్డంగుల మాదిరి కాకుండా, ఫుల్ఫిల్మెంట్ కేంద్రాల్లో... ఆటోమేటెడ్ పిక్, ప్యాక్, షిప్పింగ్ సౌకర్యాలు అందుబాటులో ఉంటాయి. ఫలితంగా ఆర్డర్లను నిర్ణీత సమయానికే డెలివరీ చేసే అవకాశం ఉంటుంది.
వ్యాపార విధానాన్నే మార్చేస్తాం
"భారత్లో కొనుగోలు, అమ్మకాల విధానాన్ని పూర్తిగా మార్చాలనే దృష్టితో, మా మౌలిక సదుపాయాలు, డెలివరీ నెట్వర్కుల్లో స్థిరంగా పెట్టుబడులు పెడుతున్నాం. ఫలితంగా మా వినియోగదారులకు వేగంగా డెలివరీ చేయడానికి వీలవుతుంది. ఇది అమ్మకందారులకు, వినియోగదారులకు ఉత్తమ అనుభూతిని అందిస్తుంది."
- అఖిల్ సక్సేనా, అమెజాన్ వైస్ ప్రెసిడెంట్, కస్టమర్ ఫుల్ఫిల్మెంట్ - ఆసియా
ఈ అమెజాన్.ఇన్ సరుకు రవాణా కేంద్రం ఏర్పాటు ద్వారా మరిన్ని నైపుణ్యంగల ఉద్యోగాల సృష్టి జరుగుతుందని సక్సేనా పేర్కొన్నారు.
ఇదీ చూడండి: అమెరికా- చైనా గిల్లికజ్జాలతో మార్కెట్లు కుదేలు
