టెలికాం సంస్థ భారతీ ఎయిర్టెల్ యాక్టివ్ సబ్స్క్రైబర్స్ సంఖ్య జనవరిలో 69 లక్షల మేర పెరిగింది. అదే సమయంలో జియో క్రియాశీల వినియోగదారుల సంఖ్య సుమారు 34 లక్షలు తగ్గింది. భారత టెలికాం నియంత్రణ ప్రాధికార సంస్థ(ట్రాయ్) ఈమేరకు జనవరి గణాంకాలను ప్రకటించింది.
ట్రాయ్ తాజా గణాంకాల ప్రకారం.. యాక్టివ్ వినియోగదారుల సంఖ్యలో ఎయిర్టెల్, జియో మధ్య తీవ్రమైన పోటీ నెలకొంది. మొత్తంగా జనవరి నాటికి ఎయిర్టెల్ క్రియాశీల వినియోగదారుల సంఖ్య 33.6 కోట్లకు ఎగసింది. మరోవైపు జియోకు 32.5 కోట్ల మంది యాక్టివ్ వినియోగదారులు ఉన్నారు.
గతేడాది నవంబర్, డిసెంబర్లో 86 లక్షల మంది నూతన వినియోగదారులు జియో నెట్వర్క్లో చేరగా.. జనవరిలో మాత్రం గణనీయంగా తగ్గిందని జేఎం ఫైనాన్షియల్ నివేదిక వెల్లడించింది. ఈ నేపథ్యంలో రానున్న రోజులు జియోకు మరింత కీలకం కానున్నాయి.
మొత్తంగా చూస్తే.. 41.7కోట్ల మంది వినియోగదారులతో దేశంలోనే అతిపెద్ద టెలికాం సంస్థగా జియో నిలిచింది. 34.46 కోట్ల మందితో ఎయిర్టెల్ రెండో స్థానంలో నిలిచింది. జనవరిలో 17 లక్షల కొత్త వినియోగదారుల చేరికతో వోడాఫోన్-ఐడియా యూజర్ల సంఖ్య 28.9కోట్లకు పెరిగింది.
ఇదీ చదవండి: నాలుగు నెలల్లో రెండుకోట్ల చందాదారులు హాంఫట్!
