ప్రభుత్వ రంగ విమానయాన సంస్థ ఎయిర్ ఇండియాను టాటా గ్రూప్ సొంతం చేసుకున్న తర్వాత.. అప్పులను బదిలీపై కేంద్రం దృష్టి సారించింది. సంస్థ బాధ్యతలు టాటా సన్స్కు అప్పగించే ముందే.. ఇంధన సరఫరా కంపెనీలకు చెల్లించాల్సిన రూ.16,000 కోట్ల బకాయిలను ప్రత్యేక సంస్థ ఎయిర్ ఇండియా అసెట్స్ హోల్డింగ్స్ లిమిటెడ్ (ఏఐఏహెచ్ఎల్)కు బదిలీ చేయనున్నట్లు తెలిపింది.
అప్పులే కాకుండా.. చమురు మార్కెటింగ్ సంస్థలకు చెల్లించాల్సిన ఇంధన బిల్లులు, ఎయిర్పోర్ట్ ఆపరేటర్స్, వ్యాపారులకు సంబంధించిన బకాయిలు ఏఐఏహెచ్ఎల్ భరించనున్నట్లు ప్రభుత్వ ఆస్తులు, పెట్టుబడుల నిర్వహణ సంస్థ (దీపమ్) కార్యదర్శి తుహిన్ కాంత పాండే పేర్కొన్నారు. డిసెంబర్ చివరి నాటికి ఈ అప్పులు మరింత పెరగకపోవచ్చని ఆయన ఆశాభావం వ్యక్తం చేశారు. అయితే అప్పటి వరకు సంస్థ రోజువారీ కార్యకలాపాలకు కావాల్సిన రూ.20 కోట్ల సహాయాన్ని ప్రభుత్వం అందిస్తూ ఉంటుందని స్పష్టం చేశారు.
ఎయిర్ ఇండియాను టాటా గ్రూప్కు అప్పగించే ముందు.. సెప్టెంబర్- డిసెంబర్ మధ్య కాలానికి బ్యాలెన్స్ షీట్లను క్లియర్ చేయనున్నట్లు తెలిపారు. ఇందులో ఏవైనా లయబిలిటీ ఉంటే వాటిని.. ఏఐఏహెచ్ఎల్కు బదిలీ చేయనున్నట్లు పేర్కొన్నారు పాండే.
ఎయిర్ ఇండియా అప్పు ఎంత?
ఈ ఏడాది ఆగస్టు నాటికి ఎయిర్ ఇండియాకు మొత్తం రూ.61,562 కోట్ల అప్పు ఉన్నట్లు తేలింది. ఇందులో రూ.15,300 కోట్లను టాటా గ్రూప్ భరించనుంది. మిగతా రూ.46,262 కోట్లను ఏఐఏహెచ్ఎల్కు బదిలీ చేయనుంది ప్రభుత్వం. వీటన్నింటితో పాటు ఎయిర్ ఇండియా భూములు, భవనాలను కూడా బదిలీ చేయనుంది. వీటి విలువ రూ.14,718 కోట్లు.
2009-10 ఆర్థిక సంవత్సరం నుంచి ఇప్పటి వరకు ఎయిర్ ఇండియా కోసం ప్రభుత్వం రూ.1.10 లక్షల కోట్ల సహాయాన్ని అందించింది ప్రభుత్వం. ఇందులో రూ.54,584 కోట్లను నగదు రూపంలో సహాయం చేయగా.. రూ.55,692 కోట్లను దీర్ఘకాల గ్యారంటీల రూపంలో ఇచ్చింది. అయినప్పటికీ సంస్థ మాత్రం లాభాల బాట పట్టలేదు.
ఇదీ చదవండి:
