దేశీయ, విదేశీ సంస్థాగత మదుపర్లు భారీగా కొనుగోళ్లు జరుపుతుండగా స్టాక్మార్కెట్లు లాభాల్లో ట్రేడవుతున్నాయి. బొంబాయి స్టాక్ ఎక్స్చేంజి సూచీ-సెన్సెక్స్ 250పాయింట్లు పెరిగి 36వేల 865వద్ద కొనసాగుతోంది. జాతీయ స్టాక్ ఎక్స్చేంజి సూచీ-నిఫ్టీ 75పాయింట్ల వృద్ధితో 11వేల 10 వద్ద ట్రేడవుతోంది.
వడ్డీరేట్ల మార్పు విషయంలో అమెరికా ఫెడరల్ రిజర్వ్ మరింత కాలం వేచిచూసే ధోరణి అవలంబిస్తుందన్న వార్తలు, భారతీయ రిజర్వ్ బ్యాంక్ రేపటి ద్రవ్యపరపతి విధాన సమీక్షలో వడ్డీరేట్లు యథాతథంగా ఉంచుతుందన్న అంచనాలు స్టాక్మార్కెట్లపై సానుకూల ప్రభావం చూపాయి. ఐటీ, లోహ రంగాల వాటాల కొనుగోళ్లు జోరుగా సాగుతున్నాయి.
లాభనష్టాల్లోనివివే...
టెక్ మహీంద్రా, జూబ్లియెంట్ ఫుడ్ల షేర్లు అత్యధికంగా 7 శాతం వృద్ధి చెందాయి. హెచ్పీసీఎల్, జీ ఎంటర్టైన్ మెంట్స్, హెచ్సీఎల్ టెక్, విప్రోలు లాభాల జాబితాలో ఉన్నాయి. ఐసీఐసీఐ బ్యాంక్, బజాజ్ ఫినాన్స్, ఇన్ఫోసిస్ 2 శాతం లాభాల్లో కొనసాగుతున్నాయి.
ఎన్టీపీసీ, రెడ్డీస్ ల్యాబ్స్, భారతీ ఎయిర్టెల్, పవర్గ్రిడ్ కార్ప్, ఇండస్ఇండ్ బ్యాంక్, అదానీ పోర్ట్స్, టాటా మోటార్స్ సంస్థలు అత్యధిక నష్టాల్లో ఉన్నాయి.
రూపాయి మారకం విలువ
ఆరంభ ట్రేడింగ్లో రూపాయి స్వల్పంగా పుంజుకుంది. 5 పైసల వృద్ధితో డాలర్తో పోలిస్తే 71.52 వద్ద ఉంది.
ఆసియా మార్కెట్లు
ఆసియా మార్కెట్లలో జపాన్ నిక్కీ 0.41 శాతం లాభపడింది. కొత్త సంవత్సరం సందర్భంగా చైనా, కొరియా మార్కెట్లకు సెలవు ప్రకటించారు.
