మోదీ ప్రభుత్వం దిగజారుడుతనాన్ని పుస్తకాల్లో రాయొచ్చని కాంగ్రెస్ అధినేత రాహుల్ గాంధీ విమర్శించారు. యువతకు ఉద్యోగాల కల్పనలో కేంద్రం విఫలమైందని ఫేస్బుక్ వేదికగా ఆరోపించారు. మహాకూటమితో పోటీపడలేకే విద్వేషపూరిత రాజకీయాలు చేస్తున్నారని రాహుల్ దుయ్యబట్టారు. ఉబర్ వాహన ఛోదకుడిపై ఓ పత్రిక ప్రచురించిన కథనం ఆధారంగా కేంద్రంపై విమర్శనాస్త్రాలు సంధిచారు రాహుల్. ఓలా, ఉబర్ సంస్థలు 20 లక్షల ఉద్యోగాల్ని సృష్టించాయన్న నీతిఆయోగ్ నివేదికపై ఆ వాహన ఛోదకుడు విరుచుకుపడిన విధానాన్ని ఉటంకించారు రాహుల్.
రెండు కోట్ల ఉద్యోగాల్ని సృష్టిస్తామని అధికారంలోకి వచ్చిన మోదీ హామీని నెరవేర్చలేకపోయారని రాహుల్ దుయ్యబట్టారు. కేంద్రం ఉద్యోగ కల్పనలో విఫలమైన కారణంగా పనిని వెతుక్కునేందుకు నిరుద్యోగులు ఎంతో శ్రమపడుతున్నారన్నారు.
2017-18 ఆర్థిక సంవత్సరానికి 6.1గా నిరుద్యోగ రేటు నమోదైందని, ఇలాంటి గణాంకాలు రావడం 45 ఏళ్లలో ఇదే ప్రథమమన్న జాతీయ గణాంక సంస్థ నివేదికను ఈ సందర్భంగా గుర్తు చేశారు రాహుల్.
