RBI Monetary Policy: కీలక వడ్డీరేట్లను ఆర్బీఐ వరుసగా పదోసారి యథాతథంగా ఉంచింది. 3 రోజుల సమీక్ష అనంతరం.. ద్రవ్య పరపతి విధాన కమిటీ(ఎంపీసీ) నిర్ణయాలను నేడు ప్రకటించారు ఆర్బీఐ గవర్నర్ శక్తికాంత దాస్. ద్రవ్యోల్బణం పెరిగిన నేపథ్యంలో.. యథాతథ స్థితిని కొనసాగించాలని ఆర్బీఐ నిర్ణయించినట్లు ఆయన స్పష్టం చేశారు. ఇందుకు కమిటీ సభ్యులు అంతా అంగీకరించారని వెల్లడించారు.
- రెపో రేటు 4 శాతం వద్ద, రివర్స్ రెపో రేటు కూడా 3.35 శాతం వద్ద యథాతథంగా ఉండనున్నట్లు పేర్కొన్నారు.
- 2020 మే 22న శక్తికాంత్ దాస్ నేతృత్వంలోని ఎంపీసీ ఆఖరిసారిగా వడ్డీరేట్లలో మార్పులు చేసింది.
- 2022-23 బడ్జెట్ తర్వాత.. తొలి ఎంపీసీ సమావేశం ఇదే.
వృద్ధి రేటుపై..
- 2022-23 ఆర్థిక సంవత్సరంలో దేశ జీడీపీ వృద్ధి రేటును 7.8 శాతంగా ఉంటుందని అంచనా వేసింది ఆర్బీఐ.
- ద్రవ్యోల్బణం 2021-22 ఏడాదికి 5.3 శాతం, 2022-23 ఏడాదికి 4.5 శాతంగా ఉంటుందని అంచనా.
రెపో, రివర్స్ రెపో రేట్లు అంటే?
బ్యాంకులు తమ అవసరాలకు.. రిజర్వు బ్యాంక్ నుంచి తీసుకునే రుణంపై చెల్లించే వడ్డీనే రెపో రేటు అంటారు. బ్యాంకుల వద్ద ద్రవ్యలభ్యత తక్కువున్న సమయంలో ఇలా రుణం తీసుకుంటాయి.
బ్యాంకులు తమ వద్ద అదనంగా ఉన్న నగదును ఆర్బీఐ వద్ద జమ చేస్తుంటాయి. ఇందుకు ఆర్బీఐ ఆయా బ్యాంకులకు చెల్లించే వడ్డీ రేటునే రివర్స్ రెపో రేటు అంటారు. ఆర్థిక వ్యవస్థలో ద్రవ్యలభ్యత పెరిగి ద్రవ్యోల్బణం ఎక్కువైనా కూడా ఆర్బీఐ.. వాణిజ్య బ్యాంకుల నుంచి రుణం తీసుకుంటుంది.
Stock Market Live: ఆర్బీఐ ప్రకటనకు ముందు దేశీయ స్టాక్ మార్కెట్ సూచీలు తీవ్ర ఒడుదొడుకుల మధ్య ట్రేడయ్యాయి. కీలక రేట్లను యథాతథంగా ఉంచుతున్నట్లు ప్రకటించిన అనంతరం.. మళ్లీ లాభాల్లోకి మళ్లాయి.
ఇదీ చూడండి: సామాన్యులపై రెపో, రివర్స్ రెపో రేట్ల ప్రభావం ఎంత?
