Woman Gets Disability After Treated For Toothache : పంటి నొప్పితో ఆస్పత్రికి వెళ్లి.. వైద్యుడి నిర్లక్ష్యంతో శాశ్వతంగా అంగ వైకల్యానికి గురైంది ఓ మహిళ. డాక్టర్ బాధ్యతారాహిత్యం వల్ల తన ఎడమ చెయ్యి, కాలులో చలనాన్ని కోల్పోయింది. ఈ పరిస్థితికి కారణమైన వైద్యుడికి రూ.9.2లక్షల ఫైన్ విధించింది జిల్లా వినియోగదారుల కోర్టు. కర్ణాటకలో ఈ ఘటన జరిగింది.
కాగా, బాధితురాలు సుకన్య. చామరాజనగర్ జిల్లాకు చెందిన ఆమె పంటినొప్పితో బాధపడుతూ.. 2021 ఫిబ్రవరి 3న స్థానికంగా ఉన్న గిరిజ డెంటల్ కేర్కు చికిత్స కోసం వెళ్లింది. డాక్టర్ మంజునాథ్ ఆధ్వర్యంలో ఈ ఆసుపత్రి నడుస్తోంది. చికిత్స సమయంలో సుకన్యకు అనస్థీషియా ఇచ్చాడు డాక్టర్ మంజునాథ్. దీంతో ఆమె అక్కడే కుప్పకూలింది. తరువాత ఆమెను మరో ఆస్పత్రికి తీసుకెళ్లారు కుటుంబ సభ్యులు. అక్కడ ఆమెకు ఐసీయూలో వారం పాటు ట్రీట్మెంట్ జరిగింది. ఆ సమయంలో లక్షల్లో ఖర్చయింది.
2022 మార్చి 25న ఘటనపై జిల్లా వినియోగదారుల కోర్టును ఆశ్రయించాడు సుకన్య కుమారుడు రవికుమార్. దీంతో డాక్టర్ మంజునాథ్కు సమన్లు జారీ చేసింది కోర్టు. వైద్యానికి సంబంధించిన రికార్డ్లతో హాజరు కావాలని డాక్టర్ మంజునాథ్ను ఆదేశించింది. దీనిపై సంవత్సరం నాలుగు నెలల తరువాత తీర్పు వెలువరించింది కోర్టు. పలువురి నిపుణుల అభిప్రాయాలను పరిగణలోకి తీసుకున్న కోర్టు.. డాక్టర్ మంజునాథ్ బాధ్యతారాహిత్యం వల్లే ఆ మహిళ తన ఎడమ చేతి, కాలు చలనం కోల్పోయిందని తెలిపింది.
వినియోగదారుల కోర్టు జడ్జి ఎంవీ భారతి.. ఈ కేసుపై విచారణ జరిపి తుది తీర్పును వెల్లడించారు. బాధితురాలికి ఆసుపత్రికి ఖర్చులు రూ.6,14,605 కాగా.. వాటికి అదనంగా మరో రూ.3 లక్షలు చెల్లించాలని కోర్టు తెలిపింది. మరో రూ.10వేల రూపాయలను ఫైన్ కింద కట్టాలని ఆదేశించింది. మొత్తం రూ.9,24,605 బాధితురాలికి చెల్లించాలి వైద్యుడికి సూచించింది. 30 రోజుల్లో పరిహారాన్ని బాధితురాలికి అందించాలని స్పష్టం చేసింది.
"బాధిత మహిళకు వైద్య సేవలు అందించడంలో డాక్టర్ మంజునాథ్ బాధ్యతరహితంగా వ్యవహరించాడు. ఈ విషయం మా విచారణలో వెల్లడైంది. ఎటువంటి ప్రాథమిక పరీక్షలు నిర్వహించకుండానే.. సుకన్యకు ఇంజెక్షన్ ఇచ్చినట్లు నిర్థరణ అయింది" అని జిల్లా వినియోగదారుల కోర్టు వెల్లడించింది. అనంతరం వైద్యుడికి ఫైన్ విధిస్తూ ఆదేశాలు జారీ చేసింది.
డెలివరీ చేసి కడుపులో టవల్‌ వదిలేసిన వైద్యుడు.. ఐదు రోజుల తర్వాత మరో ఆపరేషన్
ఐసీయూలోకి వెళ్లిన డాక్టర్.. కట్ చేస్తే జైల్లో ఊచలు లెక్కపెడుతూ..
