"జాతీయ స్థాయిలో మోదీకి ప్రత్యామ్నాయంగా దీదీ"... బంగాల్ శాసనసభ ఎన్నికల ఫలితాల తర్వాత విస్తృత చర్చ జరిగింది ఈ అంశంపైనే. అందుకు తగ్గట్టే జాతీయ ఆకాంక్షలను, అందుకు అనుసరించే ప్రణాళికలను బయట పెట్టింది తృణమూల్ కాంగ్రెస్. జాతీయ రాజకీయాల్లో సీనియర్ నేత ముకుల్ రాయ్కు ఉన్న అనుభవాన్ని ఆసరాగా చేసుకుని... ఈ వ్యూహాలను అమలు చేయాలని భావిస్తోంది టీఎంసీ. భాజపాను వీడి కొద్ది రోజుల క్రితమే తృణమూల్ కాంగ్రెస్లోకి తిరిగొచ్చారాయన.
టీఎంసీ జాతీయ ఆకాంక్షలపై చర్చ నేపథ్యంలో... ముకుల్ రాయ్, టీఎంసీ ప్రధాన కార్యదర్శి అభిషేక్ బెనర్జీ మధ్య శనివారం జరిగిన భేటీ ప్రాధాన్యం సంతరించుకుంది. ఈ సమావేశంలో చర్చించిన విషయాలు బయటకు రాకపోయినా.. దిల్లీ రాజకీయాలకు సంబంధించి ప్రధానంగా మూడు అంశాలపై చర్చించినట్లు తృణమూల్ కాంగ్రెస్ సీనియర్ నేత ఒకరు తెలిపారు.
ఇదీ చదవండి : 'దేశవ్యాప్తంగా టీఎంసీ- భాజపా ఉన్న చోట్ల పోటీ'
ముకుల్ తర్వాత వచ్చేదెవరు?
ముకుల్ రాయ్.. టీఎంసీ గూటికి తిరిగి చేరిన తర్వాత చాలామంది భాజపా నాయకులు, ముఖ్యంగా ముకుల్కు ఆప్తులు, సన్నిహితంగా ఉన్నవారు తృణమూల్ కాంగ్రెస్లో చేరేందుకు మొగ్గుచూపుతున్నారు. అయితే వీరిలో ఎవరిని పార్టీలోకి ఆహ్వానించాలి? అన్నదానిపై చర్చలు జరుగుతున్నట్లు సమాచారం.
ఇదీ చదవండి : టీఎంసీలోకి తిరిగొచ్చిన ముకుల్ రాయ్
జాతీయ స్థాయిలో ముకుల్ పాత్ర..
2022లో దేశవ్యాప్తంగా ఆరు రాష్ట్రాల్లో ఎన్నికలు జరగనున్నాయి. ఈ క్రమంలో జాతీయ రాజకీయాల్లో మంచి పట్టున్న ముకుల్ రాయ్కు ఎలాంటి పదవి ఇస్తే.. జాతీయ స్థాయిలో తృణమూల్ కాంగ్రెస్ బలపడేందుకు అవకాశం ఉంది? అన్న దానిపైనా అభిషేక్ చర్చించినట్లు తెలుస్తోంది. రాయ్.. సలహాలు, వ్యూహాలతో వచ్చే ఏడాది జరిగే ఆరు రాష్ట్రాల ఎన్నికల్లో క్రియాశీల పాత్ర పోషించాలని టీఎంసీ భావిస్తోంది.
క్రిష్ నగర్ నియోజకవర్గం నుంచి భాజపా తరఫున పోటీ చేసి గెలుపొందిన రాయ్.. తన ఎమ్మెల్యే పదవికి రాజీనామా చేసి కేంద్రంలో చక్రం తిప్పేందుకు రాజ్యసభలో అడుగుపెట్టే అవకాశం ఉంది.
ఇదీ చదవండి : Bengal: కేంద్ర భద్రత వద్దంటూ ముకుల్ రాయ్ లేఖ
త్రిపురలో పాగా కోసమేనా?..
ఈశాన్య రాష్ట్రం అయిన త్రిపురలో 2023లో అసెంబ్లీ ఎన్నికలు జరగనున్నాయి. ప్రస్తుతం త్రిపురలో భాజపా ప్రభుత్వం కొలువుదీరింది. ఈ క్రమంలో ఈశాన్య రాష్ట్రంలో తృణమూల్ కాంగ్రెస్ పాగా వేసేందుకు యత్నిస్తోంది. ఈ మేరకు ముకుల్ రాయ్తో.. పార్టీ చర్చలు జరుపుతోంది. శనివారం అభిషేక్ బెనర్జీ , ముకుల్ రాయ్ మధ్య జరిగిన సమావేశంలో ఈ అంశంపైనే చర్చించినట్లు తెలుస్తోంది.
ఇలా పక్కా వ్యూహాలతో ముందుకు సాగుతున్న టీఎంసీ జాతీయ ఆకాంక్షలు ఏ మేరకు నెరవేరతాయో వేచి చూడాలి.
ఇదీ చదవండి : 'ప్రధానిని గద్దె దించడమే నా లక్ష్యం'
